فۆڕمی ڕاستەوخۆ لە زانکۆی سەڵاحەددین بۆ دەرچووانی پۆلی 12 دابەش دەکرێت

ئاڤا نیوز

 

فۆرمی ڕاستەوخۆ لە زانکۆی سەلاحەددین دابەش دەکرێت، ئەمەش تایبەتە بەو قوتابیانەی لە هیچ زانکۆ و پەیمانگایەک وەرنەگیراون تا لەو ڕێگەیەوە لە یەکێک لە بەشەکانی  زانکۆی سەڵاحەددین درێژە بە خوێندن بدەن.

 

وێنە گەورەکە: بەشێک لە دەرچووانی پۆلی 12ـی ئامادەیی بەهۆی کەمیی نمرە یان هەبوونی کەم و کوڕی لەکاتی پڕکردنەوەی زانکۆلاین لە هیچ زانکۆ و پەیمانگایەک ناویان نەگەڕاوەتەوە، بۆ ئەوەی بێ بەش نەبن لە خوێندن زانکۆی سەڵاحەددین فۆڕمی ڕاستەوخۆی لە بەشێکی کۆلێژەکانی ڕاگەیاندووە.

 

لێدوانی فەرمی: سامان عەبدوڵڵا، بەڕێوەبەری ڕاگەیاندنی زانکۆی سەڵاحەددین، بە ئاڤا میدیای ڕاگەیاند، زانکۆی سەلاحەدین سەرجەم دەرچووانی پۆلی 12ـی ئامادەیی ئاگادار دەکاتەوە کە دەتوانن سەردانی ئەم کۆلێژانە بکەن بۆ وەرگرتنی فۆڕمی ڕاستەوخۆ؛

-    کۆلێژی زانستە ئەندازیارییە کشتوکاڵییەکان - سەرجەم بەشەکان.
-    کۆلێژی زانستە ئیسلامییەکان - بەشی وتارخوێنی و ڕاگەیاندنی ئایینی.
-    کۆلێژی ئاداب - بەشی فەلسەفە و شوێنەوار.

 

زانیاریی زیاتر: سامان عەبدوڵڵا دەڵێت، پێشبینی دەکەین ژمارەیەکی زۆر قوتابی لەو فۆڕمە سوومەند بن، هاوکات پێویستە داواکار ناوی لە هیچ شوێنێک نەگەڕابێتەوە، بۆ ئەوەی بتوانن ئەو فۆڕمە پڕبکەنەوە و بەپێی ڕێنمایی وەرگرتن بۆ ساڵی 2025-2026 مامەڵەیان لەگەڵ دەکرێت.

 

باکگراوند: بۆ ئەمساڵى خوێندن وەک ساڵانى ڕابردو (97 %) دەرچووانى قۆناغى دوانزەى ئامادەیی لە زانکۆ و پەیمانگە حکومییەکانى هەرێمى کوردستان وەرگیراون، تەنیا ژمارەیەکى کەم لە پێشکەشکاران نەبێت، کە ژمارەیان هەزار و 372 قوتابی دەبێت، کە بەهۆى هەڵە لە پڕکردنەوەى فۆرمەکانیان ناویان نەهاتۆتەوە، ئەوانیش بەپێى نمرەکانیان لە بەشە شایستەکان جێگەیان دەکرێتەوە.