دەست بە دابەشکردنی پارەی گەنمی جووتیارانی سلێمانی دەکرێت

ئاڤا نیوز

 

هەفتەی داهاتوو دەست بە دابەشکردنی بەشی دووەمی پارەی گەنمی جووتیارانی سنووری سلێمانی دەکرێت، لەماوەی هەفتەیەکدا سەرجەم جووتیاران پارەکانیان وەردەگرن.

 

وێنە گەورەکە: پرۆسەی دابەشکردنی پارەی گەنمی جووتیارانی هەرێمی کوردستان لە سنووری پارێزگاکانی هەولێر و دهۆک بەردەوامە، لە هەفتەی داهاتووشدا لە سنووری سلێمانی دەست بە دابەشکردنی پارەی گەنمی ئەو جووتیارانە دەکرێت کە گەنمەکانیان داوەتە عێراق.

 

لێدوانی فەرمی: نەوزاد شێخ کامیل، بەڕێوەبەری گشتیی بازرگانی لە وەزارەتی بازرگانیی هەرێمی کوردستان بە ئاڤای وت: بانکی ناوەندیی عێراق شەش ملیار دیناری پارەی گەنمی جووتیارانی سلێمانی ڕەوانە دەکات، پارەکە یەکشەممە دەخرێتە سەر هەژماری بانکیی بابان لە سلێمانی، ڕۆژی دووشەممە 27-10-2025، دەست بە دابەشکردنی پارەکە دەکرێت.

 

زانیاریی زیاتر: بەگوتەی نەوزاد شێخ کامیل، کۆی گشتیی پارەی گەنمی جووتیارانی کوردستان، زیاترە لە 300 ملیار دینار، لە قۆناغی یەکەم 57 ملیار دینار ڕەوانە کرا بوو، ئەمجارە کە قۆناغی دووەمە و کۆی گشتیی پارەکە 15 ملیار و 500 ملیۆن دینارە، پێشتر پێنج ملیار بۆ پارێزگای هەولێر و زیاتر لە 4 ملیاری بۆ پارێزگای دهۆک نێردرابوو، ئەوەی مابوویەوە ئەوەی سلێمانی بوو کە شەش ملیار دینارە.

 

ئەمەش بزانە: لە سەرجەم پارێزگاکانی هەرێمی کوردستان 386 هەزار تۆن گەنمی جووتیاران درابوو بە عێراق.