زانیاریی تایبەت لەبارەی بڕیارەکەی سوودانی پەیوەست بە مووچە

ئاڤا نیوز

 

محەممەد شیاع سوودانی، دوای سێ مانگ ڕاپۆرتێکی ئەنجوومەنی دەوڵەتی لەبارەی داهاتی نانەوتی کوردستان بیر دەکەوێتەوە. ئەنجوومەنی باڵای ئابووریی عێراق ڕادەسپێرێت پێداچوونەوە بە ناردنی 120 ملیار دینارەکە  بکەن.

 

وێنە گەورەکە: لە ڕابردوودا، پرسی مووچە و داهاتی ناوخۆ لەلایەن حکومەتی عێراق بە ئەنجوومەنی دەوڵەت سپێردرا، بەتایبەت بۆ یەکلاکردنەوەی ناکۆکیی هەولێر و بەغدا لەسەر داهاتی نانەوتی کوردستان. ئەوکات ئەنجوومەنی دەوڵەت لە ناوەڕاستی مانگی نۆ ڕاپۆرتێکی ئامادە کرد و ڕادەستی سوودانی کرد.

زانیاریی زیاتر: ڕۆژی دووشەممە ئەنجوومەنی دەوڵەت بەسەرپەرشتی محەممەد شیاع سوودانی، سەرۆکوەزیرانی عێراق کۆبووەوە، دوای سێ مانگ ئەو بابەتەیان بیرکەوتۆتەوە، سوودانی بە ئەنجوومەنی باڵای ئابووریی عێراق وتووە، پێداچوونەوە بە 120 ملیار دینارەکە بکەن، دیراسەی خۆتان بکەن و شتێک گەڵالە بدەن، دواتر بڕیاری لێ دەدەین.

 

لەلایەکی دیکە: ئەو بڕیارانەی لە کۆبوونەوەی ئەنجوومەنی دەوڵەت بڕیاریان لەبارەیەوە درا:

 

-بڕیاردرا بە کۆکردنەوە و ڕێکخستنی سەرجەم داهاتەکان، یەکێک لە بڕیارەکانیش پەیوەست بوو بە پێداچوونەوە بە ناردنی 120 ملیار دیناری داهاتی نانەوتی هەرێمی کوردستان، کە مانگانە وەکو مەرجی ناردنی مووچە بۆ هەرێمی کوردستان دانراوە.

-چاوخشاندنەوە بە پەرەپێدانی کۆکردنەوەی داهات لە هەموو سەرجەم کەرتەکان بەشێوەی ئەلیکترۆنی.

-پێداچوونەوەی خێرا بکرێت بە دەرماڵ و مووچەی سێ سەرۆکایەتییەکە. چاوخشاندنەوە بە بەرهەمی گەنم، بەشێوەیەک کە زامنی پاڵپشتی حکومەت بکات بە ڕێژەی 170%ـی نرخی بۆرسەی جیهان.

 

ئەوەی پێویستە بیزانیت: ئەوکات هەرێمی کوردستان تێبینی خۆیان لەسەر ڕاپۆرتەکە و بابەتی داهاتی نانەوتی بۆ بەغدا نارد. لەوکاتەوە کە سێ مانگ تێپەڕیوە، بێدەنگی لەم بابەتە کرا، ناردنی 120 ملیار دینارەکە کرایە بنەما بۆ ناردنی مووچە لە بەغداوە. هەرچەندە حکومەتی کوردستان چەند جارێک ڕایگەیاند 120 ملیار دینارەکە زۆرە و مانگانە ناتوانن ئەم بڕە بنێرن، بەڵام دەستکاری نەکرا.