کاسبکارانی زیانلێکەوتووی چەمچەماڵ لە ستۆدیۆی ئاڤا میوانی هەوراز گوڵپی بوون

ئاڤا نیوز

 

ستۆدیۆی سەعات حەوتی ئاڤا میدیا دەنگی کاسبکارانی زیانلێکەوتووانی بازاڕی چەمچەماڵی گەیاند و میوانی هەوراز گوڵپی بوون. ئەوان داوا دەکەن قەرەبووی زیانەکانیان بکرێتەوە.

 

چیرۆکی سەرەکی: ئەمڕۆ سێ شەممە 16-12-2025، ژمارەیەک لە کاسبکارانی بازاڕی چەمچەماڵ کە بەهۆی لافاوەکە زیانێکی زۆریان بەرکەوتووە، بەنوێنەرایەتیی زۆربەی کاسبکارانی بازاڕەکە، سەعات حەوت لە ستۆدیۆی سەرەکی ئاڤا میدیا میوانی هەوراز گوڵپی بوون، چیرۆکی ڕووداوی لافاوەکە و زەرەر و زیانەکانیان باس کرد و نیگەرانی و داواکارییەکانیان گەیاند. 

 

داواکارییەکان: دوای ئەوەی خەڵکی هەژار و کاسبکارانی بازاڕی چەمچەماڵ لەڕێگەی ئاڤا میدیاوە قەبارەی زەرەر و زیانەکانیان خستەڕوو، هەوراز گوڵپی داوای لە حکومەتی هەرێمی کوردستان و حکومەتی عێراقی فیدڕاڵ کرد قەرەبووی ئەو زیانلێکەوتووانە بکەنەوە، چونکە ئەو بازاڕ و کاسبکارانە بڕبڕەی پشتی ئابووری ناوچەکەن.

 

زیانە سەرەکییەکان: ئەمانەی خوارەوە پوختەی وتەی چەند خاوەن دووکانێکن لە ستۆدیۆی ئاڤا خستوویانەتەڕوو:

• خاوەن دووکانێکی چاککردنەوەی مۆبایل دەڵێت: نزیکەی حەوت هەزار دۆلار زەرەمەند بووم لە تێکچوونی شاشەی مۆبایلەکان.

•  دووکاندارێکی شەقامی شێخ ڕەزا دەڵێت: بۆ جاری پێنجەمینە دووکانەکەم ژێر ئاو دەکەوێت و هیچ جارێکیش قەرەبوو نەکراومەتەوە.

 

•  خاتوونێک کە لە بازاڕی بێستوون خاوەن دووکانی فرۆشتنی جلوبەرگی حیجابە، دەڵێت: جاری دووەمە زیانم بەردەکەوێت، ئەمجارەیان زیاتر لە پێنج هەزار دۆلار زیانی پێگەیشتووە.

•  خاوەن دووکانێک کە بە کرێ لە دووکانەکەیەتی دەڵێت: نزیکەی 10 هەزار دۆلار زیانم پێگەیشتووە، داوای لە خاوەن موڵکەکان کرد لە وەرگرتنی کرێ پەلە نەکەن و سەبریان لەسەر بگرن.