مۆساد لەبارەی هێرشەکەی ئوسترالیا: سەرپەرشتیارە ئێرانییەکانیان و جیهادییەکان دەدۆزینەوە و حسابیان لەگەڵ پاک دەکەینەوە

ئاڤا نیوز

 

سەرۆکی دەزگای هەواڵگریی ئیسرائیل (مۆساد)، پەیامێکی توندی ئاراستەی ئێران کرد و "بەڵێنی سزادانی ئەنجامدەرانی ڕووداوەکەی ئوستراڵیای دا".

 

لێدوانی فەرمی: دەیڤد بارنیا، سەرۆکی دەزگای هەواڵگریی ئیسرائیل (مۆساد)، لەمیانی مەراسیمی ڕێزلێنان لە کارمەندە سەرکەوتووەکانی دەزگاکەی ڕایگەیاند، تاران دەستبەرداری خەونی لەناوبردنی دەوڵەتی ئیسرائیل نەبووە و ئەو وڵاتە پێی وایە دەتوانێت جارێکی دیکە جیهان هەڵبخەڵەتێنێت بۆ ئەوەی ڕێککەوتنێکی ئەتۆمی خراپ جێبەجێ بکات.

 

سەرۆکی مۆساد جەختی کردەوە، ئێران وڵاتێکە هەر کاتێک بۆی بلوێت هەنگاو دەنێت، ئێمە ڕێگەمان نەداوە و ڕێگەش نادەین ڕێککەوتنێکی خراپ بێتە ئاراوە.

 

لەلایەکی دیکە: بەگوتەی بارنیا بیرۆکەی پەرەپێدانی بۆمبی ئەتۆمی هێشتا لە دڵی بەرپرسانی ئێراندایە و وتی، ئەرکی ئێمەیە دڵنیابین لەوەی پرۆژە ئەتۆمییەکانی ئێران، کە بە هاوکاری ئەمریكییەکان زیانی گەورەی پێ گەیەندراوە، هەرگیز کارا نەبێتەوە.

 

بە تەنیشت ئەم بابەتەوە: لە بەشێکی دیکەی قسەکانیدا و سەبارەت بە ڕووداوەکەی ئوسترالیا کە ژمارەیەک هاوڵاتی جوو کوژران، دەیڤد بارنیا هەڕەشەی تۆڵەسەندنەوەی کرد و وتی، هێرشبەران و سەرپەرشتیارە ئێرانییەکانیان و جیهادییەکان لە هەر کوێیەک بن دەدۆزینەوە و لە هەر شوێنێک بن حسابیان لەگەڵ پاک دەکەینەوە. دادپەروەری جێبەجێ دەکرێت و هەمووان دەیبینن، ئەوانیش خۆیان ئەمە دەزانن.