ئاڤا فێڵێكی نوێ لە بازاڕی کڕین و فرۆشتنی ئۆتۆمبێل ئاشکرا دەکات

ئاڤا نیوز

 

بەپێی بەدواداچوونەکانی ئاڤا میدیا، چەند کەسێک لە ناو بازاڕی کڕین و فرۆشی ئۆتۆمبێل لە هەولێر، فێڵێکی نوێیان دۆزیوەتەوە بۆ هەڵخەڵەتاندنی ئەو کەسانەی ئۆتۆمبێل دەکڕن و چەند کەسێک پارەی زۆریان خوراوە.

 

چیرۆکی سەرەکی: کڕیارێکی ئۆتۆمبێل بە نەجات هەرکی، پەیامنێری ئاڤا میدیای راگەیاند، چووەتە یەکێک لە پێشانگاکانی ئۆتۆمبێل و حەزی لەوە نەکردووە ئۆتۆمبێلی بێ سەرەتا و بێ ناسنامە بکڕێت، هەر بۆیە ئۆتۆمبێلێکی کڕیوە کە ساڵیانە – سەنەوی هەبووە و تەلەفۆنیشی بۆ ژمارەکەی سەر سەنەوییەکە کردووە بۆ دڵنیابوونەوە لە خاوەنەکەی، بەڵام کاتێک ڕۆیشتووە بۆ بەڕێوەبەرێتیی هاتوچۆ بۆ ئەوەی بیکات بە ناوی خۆیەوە، دەرکەوتووە ئەو ئۆتۆمبێلە هیچ سەرەتایەکی نییە و سەنەویی ئۆتۆمبێلەکە ساختە بووە و ژمارە تەلەفۆنەکەش داخراوە.

 

مامەڵە مەترسیدارەکە: چەند کەسێک بە ئاگاداریی ژمارەیەک پێشانگای ئۆتۆمبێل سەرقاڵی ئەوەن ئەو ئۆتۆمبێلانەی خاوەنەکانیان شوێنبزرە، مردووە یان بێ سەرەتایە، بە نرخێکی زۆر هەرزان دەیکڕنەوە و سەنەوییەکی ساختەی بۆ دروست دەکەن و بە نرخێکی زۆر گرانتر دەیفرۆشنەوە، بۆ ئەو مەبەستەش ژمارەیەکی تەلەفۆن دەخەنە سەر سەنەوییەکە، کاتێک کڕیارەکە تەلەفۆنی بۆ دەکات، کڕیارەکە دڵنیا دەکەنەوە کە کەی بییەوێت ئۆتۆمبێلەکە دەکات بە ناویەوە، بەڵام پاش فرۆشتنی ئۆتۆمبێلەکە ئیتر ژمارەکە دادەخەنەوە و لێی ناپرسنەوە.

 

زانیاری زیاتر: بە پێی بەدواداچوونەکانی ئاڤا میدیا، هەندێک لە سەنەوییەکان لە پاڕێزگای دیالە و دووز تەزویر دەکرێن و بەدوور نازانرێت ژمارەیەک لە تۆمەتبارەکانە لەو ناوە خۆیان حەشار دابێت.

 

چارەسەر: هێزەکانی پۆلیس و ئاسایش لە مامەڵە ساختەکە ئاگادار کراونەتەوە و بەدواداچوونەکان بەردەوامن بۆ دەستگیرکردنی تۆمەتبارەکان و گەڕاندنەوەی مافی کڕیارەکان، بۆ ئەو مەبەستەش چەند کەسێک دەستگیر کراون.

 

هۆشداریی: بەڕێوەبەرێتی هاتوچۆی هەولێر، داوا لەو کەسانە دەکەن کە ئۆتۆمبێل دەکڕن و گومانیان هەیە لە مامەڵەکە و خاوەندارێتیی ئۆتۆمبێلەکە، سەردانیان بکەن و بەدواداچوونی بۆ بکەن بەرلەوەی مامەڵەکە تەواو بکەن، بۆئەوەی دڵنیاببنەوە لەوەی سەنەوییەکەی راستییە یان ساختەیە.