خاوەن حەوزەکانی بەرهەمهێنانی ماسی کە لافاو زیانی پێ گەیاندون: ئاڤا فریامان بکەون

ئاڤا نیوز

 

بەهۆی لافاوەکەی هەفتەی ڕابردوو، زیانی زۆر بەر حەوزەکانی بەرهەمهێنانی ماسی لە سنووری تەقتەق و ڕێڕەوی ئاویی زێی بچووک کەوتوون و بەپێی خەمڵانە سەرەتاییەکان 800 هەزار ماسی پڕۆژەکان لەناوچوون و زیاتر لە 200 حەوزی بەرهەمهێنانی ماسی زیانیان پێگەیشتووە.

 

چیرۆکی سەرەکی: بەرنامەی بە ڕزگار بڵێ، سەردانی ناحیەی تەقتەقی کرد، بۆئەوەی سکاڵا و داخوازییەکانی خاوەن حەوزەکانی بەرهەمهێنانی ماسی بگەیەنێتە بەرپرسان، چونکە بەهۆی لافاوەکەی 9-12-2025 زیانی زۆریان بەرکەوتووە و هیچ لایەنێکی پەیوەندیداریش بەدەم داخوازییەکانیانەوە نەچووە.

 

ئەوەی گرنگە بزانرێت: ڕزگار کۆچەر، سەردانی گوندی کەپەنەی کردووە، کە زۆرترین زیانی ماددی بەر حەوزەکانی بەرهەمهێنانی ماسی لەو گوندە کەوتووە و جوتیارێک دەڵێت، ئەگەر حکومەت هاوکارییمان نەکات، زۆر سەختە بتوانین جارێکی دیکە ماسی بخەینەوە ناو حەوزەکانمان، چونکە قەرزارین و زیانی زۆرمان کردووە.

 

شایەتحاڵێک: یەکێک لە خاوەن پرۆژەکانی بەرهەمهێنانی ماسی کە لافاوەکە زیانی زۆری پێگەیاندووە، بە ئاڤا میدیای وت: خەڵکی چاو چنۆک هەبووە وەزعەکەیان ئیستیغلال کردووە و لەکاتی لافاوەکە کارەبایان لە ئاوی لافاوی زێی بچووک داوە و یەکێک دەناسن، سێ تۆن ماسی ئەوانی بەو شێوەیە بردووە.

 

داخوازیی: جوتیارەکان داوایان لە ڕزگار کۆچەر کردبوو لە کاتژمێر 7:00 هەوراز گوڵپی، دەنگیان بگەیەنێت و کێشەکەیان بخاتە بەردەم لایەنە بەرپرسەکان و قەرەبوویان بکرێتەوە، چونکە بەهۆی لافاوەکەوە سەدان کەس بێ کار و بێ کاسپی بوون.

 

باکگراوند: جوتیاری وا هەیە 50 ملیۆن دینار زیانی بەرکەوتووە، زۆرینەی حەوزەکانی بەرهەمهێنانی ماسیش دەکەونە ئەو ناوچە دابڕێنراوانەی سنووری ژێر دەسەڵاتی حکومەتی عێراقی، بەبێ ئەوەی بەدواداچوون بۆ زیانەکانیان بکەن و لێیان بپرسنەوە و قەرەبوویان بکرێتەوە.