کێشەی دۆلاری سپی و شین لە هەولێر چارەسەر کرا

ئاڤا نیوز

 

کێشەی وەرگرتنی دۆلاری سپی و شین لە هاونیشتمانیان لە بازاڕەکانی هەولێر چارەسەر کرا. بەگوێرەی بڕیارێکی وەزارەتی ناوخۆ هەر کەسێک پابەند نەبێت، لێپێچینەوەی لەگەڵدا دەکرێت.

وێنە گەورەکە: لەنێو بازاڕەکانی هەرێمی کوردستان، دیاردەیەک پەیدا بووە کە دۆلاری سپی، دۆلاری کۆن و پەنجا دۆلاری، کەمتر لە نرخی دۆلاری شین لە خەڵک وەردەگیرێت، ئەوەی چاپی کۆن و نوێکە، تەنانەت لە هەندێک شوێن ئامادە نین دۆلاری سپی وەربگرن.

 

ئەمە گرفتی بۆ هاونیشتمانیان و بازاڕەکانی دراو دروست کردووە، لەبەرئەوەی بڕێکی زۆری دۆلاری سپی لە بازاڕدا هەیە و بەشێکیشی هی بازاڕەکانی ناوەراست و باشووری عێراقە دەهێنرێتە هەولێر.  

لێدوانی فەرمی: كەیفی خۆشناو، وتەبێژی بازاڕی دۆلارفرۆشانی هەولێر لە بەرنامەی زەنگی بازاڕی ئاڤا گوتی: "ڕۆژانە لە بەغدا و ناوچەکانی دیکەی عێراقەوە دۆلاری سپی دەهێنرێتە نێو بازاڕی دراوی هەولێرەوە. بۆیە بە نووسراوی فەرمی داوامان لە لایەنە پەیوەندیدارەکان کردووە ڕێگە بە هاتنی دۆلاری کۆن نەدەن.

 

هاوکات بازرگان و خەڵکی دیکە دۆلاری شین لە هەولێرەوە دەبەنە بەغدا. واتە چاپی کۆن دەهێننە هەولێر و چاپی نوێ دەبەنە دەرەوە، بەمەش ڕێژەی دۆلاری چاپی کۆن لە بازاڕەکانی هەولێر زیادی کردووە.

چارەسەرەکان: بڕیارێک لە وەزارەتی ناوخۆ دەرچووە، بەپێی بڕیارەکە لە هەر دەفتەرێکدا، ئاساییە ئەگەر حەوت هەزار دۆلاری شین و سێ هەزار دۆلاری  سپی هەبێت، تەنانەت ئاساییە کە چوار پەنجا دۆلاریشی تێدابێت، پێویستە ئەوانەی ئاڵۆگۆڕی دراو دەکەن، لە خەڵکی وەربگرن و مامەڵەی پێوە بکەن. هەر کەسێک پابەندی ئەو بڕیارە نەبێت، لێپێچینەوەی لەگەڵدا دەکرێت.