بەها ئەعرەجی: هەوڵ دەدرێت ناتەبایی لەنێو چوارچێوەی هەماهەنگی دروست بکرێت

ئاڤا نیوز

هاوپەیمانیی ئاوەدانکردنەوە و گەشەپێدان بە سەرۆکایەتیی محەممەد شیاع سوودانی ئاشکرای دەکات، هەوڵدەدرێت ناکۆکی و ناتەبایی لەنێو لایەنەکانی هاوپەیمانیی چوارچێوەی هەماهەنگی بچێنرێت، هاوکات دەستوەردانی دەرەکی لەکاروباری ناوخۆی عێراق ڕەتدەکەنەوە.

چیرۆکی سەرەکی: ڕۆژی سێشەممە، دۆناڵد ترەمپ، سەرۆکی ئەمریکا بڕیاری کاندیدکردنی نووری مالیکی لەلایەن چوارچێوەی هەماهەنگیی بۆ پۆستی سەرۆکوەزیرانی عێراق بە زۆر خراپ وەسف کرد و هەڕەشەی بڕینی هاوکارییەکانی بۆ عێراق کرد لە حاڵەتی هەڵبژاردنەوەی مالیکی وەکو سەرۆکوەزیران.

لێدوانی فەرمی: بەها ئەعرەجی، سەرۆکی فراکسیۆنی هاوپەیمانیی ئاوەدانکردنەوە و گەشەپێدان لە پەرلەمانی عێراق لە تۆڕی "ئێکس" ڕایگەیاند: دەستوەردانی دەرەکی لە سەپاندن و ملکەچکردن لە هەر وڵاتێک بێت ڕەتی دەکەینەوە و پشتیوانیی یەکڕیزیی چوارچێوەی هەماهەنگی و پتەوکردنی هەڵوێستەکەی دەکەین. هاوکات بەرپەرچی هەوڵەکانی چاندنی ناتەبایی و دووبەرەکی لەنێوان لایەنەکانی چوارچێوەکە دەدەینەوە.

ناوبراو دەشڵێت، هەموو ئەمانە بەرپرسیارێتی ئەخلاقی و نیشتمانین، نەگۆڕن و سازشیان لەسەر ناکرێت و بەڵێنێکە پاشگەزبوونەوەی نییە.

ئەوەی پێویستە بیزانیت: لێدوانەکەی ترەمپ کاردانەوەی زۆری لایەنە شیعەکانی بەدوای خۆیدا هێنا و زۆربەی لایەنەکانی چوارچێوەی هەماهەنگی دژی ئەو هەڵوێستەی سەرۆکی ئەمریکا وەستانەوە هاوکات مالیکی ڕایگەیاند، پاشەکشە ناکات و بەردەوام دەبێت لەخۆ کاندیدکردن بۆ پۆستی سەرۆکوەزیران.