بەخۆڕایی چارەسەری ئەو نەخۆشانە دەکرێت کە زیانلێکەوتووی لافاوەکەی چەمچەماڵن

ئاڤا میدیا

 

نەخۆشخانەیەکی کەرتی تایبەت لە شاری هەولێر، خەرجی چارەسەری ئەو نەخۆشانە لە ئەستۆ دەگرێت کە زیانلێکەوتووی لافاوەکەی سنووری قەزای چەمچەماڵن.

 

وێنە گەورەکە: دوای دروستبوونی لافاو بەهۆی بارانبارینەوە لە قەزای چەمچەماڵ و ناحیەکانی تەکیە و شۆڕش، مرۆڤدۆستان و خێرخوازان و ڕێکخراوەکان بەپێی توانای خۆیان لەهەر لایەکەوە دەستی هاوکاریکردن و کۆمەکەکانیان گەیاندە لێقەوماوان، ئاڤا میدیاش کەمپەینێکی بەرفراوانی کۆمەککردنی ڕاگەیاند.

 

لێدوانی فەرمی: سەید زەمان حەسەن، ئەندامی پەرلەمانی کوردستان لە فراکسیۆنی پارتی ڕایگەیاند، لە چوارچێوەی کۆمەک و هاوکارییەکان بۆ زیانلێکەوتووانی لافاوەکەی سنووری قەزای چەمچەماڵ، هەماهەنگیمان لەگەڵ نەخۆشخانەی (بەلسەم)ی ئەهلی کردووە لە شاری هەولێر، هەر نەخۆشێک کە زیانلێکەوتووی لافاوەکەی چەمچەماڵ بێت، ئەگەر لەڕێگەی ئاڤا میدیاوە بچێتە نەخۆشخانەکە، چارەسەری پێویستی بۆ دەکرێت، تەنانەت ئەگەر تێچووی چارەسەرییەکەی بگاتە 20 ملیۆن دیناریش.

ڕاشیگەیاند، لەگەڵ چەند نەخۆشخانەیەکی دیکەی کەرتی تایبەت لە هەوڵداین کە ئەوانیش بێنە ناو هەڵمەتەکە، بۆئەوەی وەکو پڕۆژەیەک، زۆرترین نەخۆش لە چارەسەرکردن و هاوکارییەکان سوودمەند بێت.