ئەو بەربەستانەی بوونە هۆکاری لافاو لە چەمچەماڵ هێشتا لانەبراون

ئاڤا نیوز

 

هێشتا ئەو بەربەستانەی بوونەتە هۆکاری دروست بوونی لافاو لە سنووری چەمچەماڵ لانەبراون  و کەند و ڕێڕەوەکانی ئاوی باران پاک نەکراونەتەوە، لە ئەگەری بارینی بارانی بە لێزمە مەترسی دووبارە بوونەوەی لافاوی لێ دەکرێت.

 

بەدواداچوونی ئاڤا: لە بەدواداچوونی بەرنامەیەکی تایبەتی ئاڤا میدیا، ڕۆکان مەحموود لەگەل تیمی بەرنامەکەی چوونەتە ئەو شوێنانەی بوونەتە هۆی دروست بوونی لافاو لە سنووری چەمچەماڵ، لە بەدواداچوونەکە دەرکەوتووە ئەو بەربەستانەی بوونەتە هۆکاری دروست بوونی لافاو و خەڵکی سنوورەکە داوای لابردنیان دەکات، لانەبراون، هیچ کام لە کەند و ڕێڕەوەکانی ئاوی باران و بەربەستەکانیش خاوێن نەکراونەتەوە.

 

مەترسییە پێشبینیکراوەکان: لانەبردنی بەربەستەکان و خاوێننەکردنەوەی ڕێڕەوەکانی ئاوی باران، لەهەر شەپۆلێکی بارانبارین بە تایبەت ئەگەر بارانی بەخوڕ ببارێت، مەترسیی دووبارەبوونەوەی لافاو لەو سنوورانەی لێ دەکرێت.

 

باکگراوند: هەفتەی ڕابردوو لافاو لە سنووری چەمچەماڵ، شۆرش، تەکیە، پیرەمەگرون، بازیان و ئاغجەلەر دروست بوو، بەهۆیەوە زیانی گیانی و زیانی گەورەی ماددی لێکەوتەوە.