نزیکەی 50 ئەندامی دیکەی گرووپی "قوربانییەکان" دەستگیر کران

ئاڤا نیوز 

دەزگای ئاسایشی نیشتمانیی عێراق، دەستگیرکردنی ژمارەیەکی دیکە لە ئەندامانی گرووپە لادەرەکان بە دیاریکراویش گرووپی قوربانییەکان لە چوار پارێزگای عێراق ڕادەگەیێنێت.

وێنە گەورەکە: لە پارێزگاکانی موسەننا، زیقار، واست و میسان دەزگای ئاسایشی نیشتمانیی عێراق ژمارەیەک ئەندامی گرووپی "قوربانییەکان" یاخود "عەلاهییەکان"ی دەستگیر کرد کە گرووپێکی قەدەغە کراون لە عێراق.

ڕاگەیێنراوی فەرمی: دەزگای ئاسایشی نیشتمانیی عێراق ڕایگەیاند: بە پشتبەستن بە زانیارییە هەواڵگرییەکان مەفرەزەکانمان لە پارێزگای موسەننا توانییان 20 ئەندامی بزووتنەوەکە دەستگیر بکەن، هاوکات لە پارێزگاکانی زیقار، واست و میسانیش توانیان 27 ئەندامی دیکەی ئەو گرووپە قەدەغەکراوە دەستگیر بکەن.

ئەوەی پێویستە بیزانیت: عەلاهییەکان گرووپێکی "تووندڕەو"ـی شیعەن، قوربانییەکانیشیان پێ دەگوترێت، بەوە ناسراون ئەندامانی خۆیان و خەڵکی دیکەش دەکەنە "قوربانی لەپێناو خودا"، ڕەفتاری نامۆ دەکەن و لە نێوان خۆیان تیروپشک دەکەن کامەیان ناوی دەربچێت خۆی دەکوژێت.

زانیاریی زیاتر: ئەندامانی ئەو ئەو گرووپە قەدەغەکراوە، تەمەنیان لە خوار 23 ساڵەوەیە و زۆرینەیان هەرزەکارن.