لە هەولێر 70 وەبەرهێنەر خەڵات کران

ئاڤا نیوز

 

ئەمڕۆ چوارشەممە سەرۆکوەزیران مەسرور بارزانی خەڵاتی ڕێزلێنانی بە 70 وەبەرهێنەری هەرێمی کوردستان بەخشی.

لێدوانی فەرمی: سەرۆکوەزیران بارزانی لە مەراسیمەکەدا گوتارێکی پێشکەش کرد و ڕایگەیاند: "ئەم خەڵاتە بۆ هەموو ئەو وەبەرهێنەرانەیە کە خزمەتی خەڵکی کوردستانیان کردووە، پێزانینی ئێمەیە لەپای ئەو خزمەتەی کردووتانە".

 سەرۆکوەزیران ئاماژەی بۆ ئەوە کرد حکومەت بە هاوکاری وەبەرهێنەران ئاستەنگ و قەیرانەکانی تێپەڕاندووە، لەپای ئەوەش سوپاسی کردن و گوتی: "سوپاستان دەکەم کە ڕۆڵتان هەبووە لە یارمەتیدانی حکومەت و ڕۆڵی کاریگەرتان هەبووە لە خزمەتکردنی هاونیشتمانیان، بەبێ ئێوە ئەو هەموو پڕۆژەیە نەدەکرا، ئامانجمان دروستکردنی ژێرخانێکی ئابووریی بەهێزە".

 

لەلایەکی دیکەوە: بەرگەشت ئاکرەیی، گوتەبێژی دەستەی وەبەرهێنان بە ئاڤا نیوزی گوت: ئەو 70 وەبەرهێنەرە قوتابخانە و نەخۆشخانە و بنکەی پۆلیسیان دروست کردووە، خەڵکی سەرجەم ناوچەکانن لە کەلارەوە تا دەگاتە زاخۆ.