ئیدارەی خۆسەر داوا لە گەلی کورد دەکات بەردەوام بێت لە پشتیوانیکردنی ڕۆژئاوا

ئاڤا نیوز

ئیلهام ئەحمەد، بەرپرسی ئیدارەی خۆسەر لە ڕۆژئاوای کوردستان پەیامێکی بڵاو کردەوە و سوپاس گەلی کوردی لە نیشتمان و تاراوگە کرد بۆ پشتیوانییە جۆراوجۆرەکانیان لە ڕۆژئاوای کوردستان کە زیاتر لە دوو هەفتەیە ڕووبەڕووی هێرشەکانی سوپای سووریای عەرەبی بووەتەوە.

چیرۆکی سەرەکی: ڕۆژانە سەدان هەزار هاونیشتمانیی کورد لە هەموو پارچەکانی کوردستان و تاراوگە و بە تایبەتی هەرێمی کوردستان ڕژانە سەر شەقام بۆ پاڵپشتیکردنی کوردی ڕۆژئاوا و ڕەتکردنەوەی هێرشەکانی سوپای عەرەبی سووریا بۆ سەر ڕۆژئاوای کوردستان هاوکات هەڵمەتی کۆکردنەوەی هاوکاری مرۆیی لە شارەکانی هەرێمی کوردستان دەستیپێکردووە.

بڵاوکراوەی فەرمی: ئیلهام ئەحمەد، بەرپرسی ئیدارەی خۆسەر لە تۆڕی "ئێکس" ڕایگەیاند: هەموو سوپاس و پێزانینێک بۆ گەلی کورد لە نیشتمان و تاراوگە بۆ پاڵپشتی دڵسۆزانە و بەرپرسیارانەی لە خەباتی ئیدارەی خۆسەر و هێزەکانی لە سووریا.

داواکاری فەرمی: ئیلهام ئەحمەد داوا لە گەلی کورد دەکات و دەڵێت: دەنگەکانتان، پاڵپشتیتان و چالاکی سیاسی و میدیایی ئێوە هێڵی ڕاستەقینەی بەرگریکردنی لە کەرامەتی گەلەکەمان و مافی ژیانکردن بە ئازادی و ئاسایشدا پێکهێناوە، بە ئیرادەیەکی بێوچان درێژە بە هەوڵەکانتان بدەن بۆ کۆتاییهێنان بە هەڕەشەی کۆمەڵکوژی دژی گەلی کورد.

لەلایەکی دیکەوە: سەرەڕای نارەزایەتییەکانی شەقام، سەرکردایەتیی هەرێمی کوردستان بەچڕی لەسەر هێڵن بۆ ڕاگرتنی دەستدرێژییەکانی سەر ڕۆژئاوا، سەرۆک بارزانی سەردانی ئیتاڵیای کرد و لەگەڵ بەرپرسە باڵاکانی ئەو وڵاتە لەبارەی ڕۆژئاوا کۆبووەوە، سەرۆکوەزیران مەسرور بارزانی لە کۆڕبەندی داڤۆس لەگەڵ چەندین بەرپەرسی یەکەم و باڵاکانی وڵاتانی ئەوروپی و عەرەبی بۆ چارەسەکردنی ئاڵۆزی و شەڕ لەسەر ڕۆژئاوا کۆبووەتەوە.