گفتوگۆی سەرۆکوەزیران بارزانی و کاسبکارانی بازاڕی قەیسەری

ئاڤا نیوز

 

ئەمڕۆ پێنجشەممە سەرۆکوەزیران بارزانی لەگەڵ وەزیری ئەوقاف و پارێزگاری هەولێر سەردانی بازاڕی قەیسەریی هەولێری کرد و مژدەی قەرەبووکردنەوەی زیانلێکەوتووانی بازاڕەکەی بەهۆی ئاگرکەوتنەوەکان ڕاگەیاند.

 

وێنە گەورەکە: ئەمساڵ دووجار بازاڕی قیسەری هەولێر سووتا و بەوهۆیەوە سەدان دووکان و کۆگا سووتان، هەر زوو سەرۆکوەزیران بارزانی هاتەدەنگ و داوای لێکۆڵینەوەی خێرای لە هۆکاری ڕووداوەکە کرد، بڕیاری قەرەبووکردنەوەی زیانلێکەوتووانیشی دا.

 

لێدوانی فەرمی: سەرۆکوەزیران بارزانی لەمیانەی گفتوگۆکردن لەگەڵ ژمارەیەک لە کاسبکار ڕاگەیاند: 'ئێمەش هەولێرین'، هەر دوای سووتانی ئەو بازاڕە سەردانم کرد و داوام لە لایەنە پەیوەندیدارەکان کرد هەرچی زووە بکەرانی ئەو کارە ئاشکرا بکرێن و هەر زووش ئەوە ئاشکرابوو کە دەستی کێی لەپشتەوە بوو، داواش لە هەمووان دەکەم هەرچی زووە کاربکرێت بۆ زووتر نۆژەنکردنەوەی بازاڕەکە، تاوەکو کاسبکاران بچنەوە سەر کەسابەتی خۆیان.

 

ئەوەی پێویستە بیزانیت: سەرۆکوەزیران بارزانی لە سەردانەکەیدا مژدەی قەرەبووکردنەوەی زیانلێکەوتووانی بازاڕەکەی دا، دواتر لە کۆنگرەیەکی ڕۆژنامەوانیدا ئومێد خۆشناو، پارێزگاری هەولێر نێوەڕۆکی قەرەبووکردنەوەکەی ئاشکراکرد و گوتی: "هەفتەی داهاتوو دەست بە دابەشکردنی هاوکاری بەسەر زیانلێکەوتووانی بازاڕی قەیسەریی دەکرێت، قەرەبووەکە لە دوو ملیۆن دینارەوە تاوەکو 20 ملیۆن دینار دەبێت".