بەپێی ئەو زمانەی قسەی پێ دەکات، دەنگی مرۆڤ دەگۆڕێت

ئاڤا نیوز

زانست هۆکارەکانی ئەوەی دۆزیوەتەوە بۆچی لە کاتی قسەکردن لە زمانێکەوە بۆ زمانێکی دیکە دەنگی مرۆڤ دەگۆڕێت، کاتێك بە فارسی دەدوێیت دەنگ ناسکتر، بە تورکی دەنگی گڕترە و بە عەرەبی دەنگی بەرزتر دەبێت.

بڵاوکراوەی فەرمی: بە پشتبەستن بە چەند سەرچاوەیەکی زانستی BBC ڕاپۆرتێکی بڵاو کردووەتەوە و هۆکارەکانی دەنگ گۆڕانی مرۆڤی خستووەتە ڕوو، بەپێی ئەو زمانەی قسەی پێ دەکات.

بە تەنیشت ئەم بابەتەوە: دکتۆر ئانا پاوڵا، پسپۆڕی زانستی دەنگ لە بەڕازیل ئاماژە بەوە دەدات دەنگ سەرەتا لە دەنگە ژێکانەوە، پاشان بە ڕێڕەوی دەنگدا (قورگ، زمان، دەم و لێودا) دێت و شێوە دەگرێت، پاشان دەگۆڕێت بۆ قسە و دەڵێت: بۆ دەرکردنی دەنگەکانی زمانێکی دیکە، ناچارین شێوازی وەستانی  'زمان، شەویلگە و لێوەکان' بە تەواوی بگۆڕین. 

- بۆ نموونە قسەکردن بە فەرەنسی ماسوولکەکانی دەم گرژ دەکات، بەڵام هۆڵەندی دەنگێکی قووڵتری دەوێت.

ئەوەی پێویستە بیزانیت: دکتۆر میشێل پارادۆڤسکی باس لەوە دەکات زمان هەڵگری کولتوورە. کاتێک فێری زمانێک دەبین، لاسایی "زمانی جەستە" و "هەڵسوکەوتی" خەڵکەکەشیان دەکەینەوە. ئەگەر زمانەکە هی گەلێکی دەنگ بەرز بێت (وەک ئیتاڵی)، ئێمەش بێئاگایانە دەنگمان بەرز دەکەینەوە.

- توێژینەوەکان دەریدەخەن هەر زمانێک لەرینەوەی تایبەت بەخۆی هەیە. مرۆڤ هەوڵ دەدات دەنگی لەگەڵ ئەو لەرینەوەیەدا بگونجێنێت. 

لەلایەکی دیکەوە: مرۆڤ لە قۆناغی فێربوونی زمانێکدا، بەهۆی بیرکردنەوە و ترسی هەڵەکردن، ژێکانی دەنگی گرژ دەبن و دەنگ "بەرز و تەنک" دەردەکەوێت، بەڵام کاتێک ئەم قۆناغە تێدەپەڕێنێت، دەنگی دەگەڕێتەوە دۆخی ئاسایی.