زیاتر لە هەزار و 600 تۆن بەرهەمی جووتیارانی دهۆک ڕەوانەی ئەورووپا کراوە

ئاڤا نیوز

 

پرۆسەی بەبازاڕكردنی بەرهەمی جووتیاران لە بازاڕەكانی جیهان بەردەوامە، لەو چوارچێوەیە ئەمساڵ سەدان تۆن بەرهەمی سماق و هەنجیر، ڕەوانەی بازاڕەكانی ئەوروپا كراوە.

 

وێنە گەورەكە: كابینەی نۆیەمی حكومەتی هەرێمی كوردستان، پەرەی بە بووژاندنەوەی كەرتی كشتوكاڵی و پاڵپشتی بەرهەمی خۆماڵیی جووتیاران داوە، جگە لە بەرهەمی دانەوێڵە ڕۆژانە سەدان تۆن بەرهەمی خۆماڵی ڕەوانەی پارێزگاكانی عێراق، وڵاتانی كەنداو و جیهان دەكرێت.

لێدوانی فەرمی: ئەحمەد جەمیل، بەڕێوەبەری گشتیی كشتوكاڵی دهۆك بە ئاڤای گوت، "له‌ماوه‌ى 11 مانگی ئەمساڵ، زیاتر لە  هەزار و 661 تۆن له‌ به‌روبوومى خۆماڵى بریتین لە‌ برنجی كوردی، سماق، هەنجیری وشككراو، مێوژ و فستق هه‌ناردەی توركیا كراوە، لەوێشەوە بۆ بازاڕەكانی ئەورووپا دەچێت."

 

ژمارەكان وادەڵێن: ئاماری 11 مانگی بەرهەمی هەناردەكراوی جووتیارانی سنووری پارێزگای دهۆك بۆ توركیا و وڵاتانی ئەورووپا، بەمشێوەیە بووە:-

برنجی كوردی: 71 تۆن

سماق: هەزار و 589 تۆن

هەنجیری وشككراو: 150 كیلۆگرام

مێوژ: 250 كیلۆگرام

فستق: هەزار و 250 كیلۆگرام

 

ئەوەی پێویستە بیزانیت: جگە لە هەناردەکردنی بەرهەمی جوتیاران بۆ ئەوروپا، بازاڕی وڵاتانی کەنداو بەڕووی چەندین جۆری بەرهەمی کوردستاندا کراوەتەوە و لە هەرێمی کوردستان، ساڵانە 600 هەزار تۆن پەتاتە بەرهەم دێت، ئەوەش چوار هێندەی پێداویستیی ناوخۆیە، بۆ یەکەمجاریش لە ساڵی 2022، 20 هەزار تۆن پەتاتە ڕەوانەی وڵاتانی قەتەڕ و ئیمارات کران.

 

لە ساڵی 2023ـیشدا، 16 هەزار تۆن ڕەوانەی ئیمارات، سعوودیە، بەحرەین، قەتەڕ و عەممان کرا، هەرچی ساڵی ڕابردووە هەشت هەزار تۆن پەتاتە ڕەوانەی ئیمارات، سعودیە، سووریا و  لیبیریا لە باشووری کیشوەری ئەفریقا کراوە.

 

هەروەها مانگی رابردوو، بە چەند قۆناغێک، 100 تۆن پەتاتەی خۆماڵی جووتیارانی هەرێمی کوردستان، هەناردەی وڵاتی ئیمارات کرا.