سوپای پاسداران کوژرانی چوار ئەندامی سوپاکەی ڕاگەیاند

ئاڤا نیوز

لە هێرشێکی چەکداریدا لە  ناوچەی "لار"ـی سەر بە شاری زاهیدانی ئێران، چوار ئەندامی سوپای پاسداران کوژران و ژمارەیەکیش بریندار بوون.

وێنە گەورەکە: ڕۆژی چوارشەممە، لە ناوچەی لار کە دەکەوێتە نزیک سنووری ئەفغانستان گرووپێکی چەکدار هێرشیان کردووەتە سەر بنکەیەکی سەربازی سوپای پاسداران کە بەهۆیەوە چوار ئەندامی سوپا دەکوژرێن و سێ کەسی دیکەشیان بریندار دەکرێن.


ڕاگەیێنراوی فەرمی: پەیوەندییە گشتییەکانی فەرماندەیی قودسی سوپای پاسدارن لە بڵاوکراوەیەکدا ڕایگەیاند: ژمارەیەک چەکدار پەلاماری هێزەکانمانیان داوە لە ناوچەی "لار"ـی زاهیدان بەهۆیەوە ژمارەیەک سەربازمان کوژراو بریندا بوون، تا ئێستا نازانرێت ئەو هێرشە لەلایەن کام گرووپ ئەنجامدراوە.

زانیاریی زیاتر: تا ئێستا هیچ گرووپێکی چەکدار ئەو هێرشەی نەگرتووەتە ئەستۆ بەڵام لەلایەکی دیکەوە سوپای پاسداران، گرووپی 'جەیشولعەدل' بەو هێرشانە تۆمەتبار دەکات کە بە گوێرەی پلان و هاوکاریی دوژمنانی ئێران، پەلاماری هێزە ئەمنییەکانی ئێران و دامەزراوە خزمەتگوزارییەکان دەدەن.