فەرەنسا ڕاهێنان بە کارمەندانی وەزارەتی ناوخۆ دەکات

ئاڤا نیوز

کونسوڵخانەی فەرەنسا لە هەولێر خولێکی پێنج ڕۆژی بۆ کارمەندانی وەزارەتی ناوخۆ کردەوە بۆ بەرەنگاربوونەوەی تاوانی ڕێکخراو و بازرگانیکردن بە مرۆڤ.

 

وێنە گەورەکە: وەزارەتی ناوخۆی حکومەتی هەرێمی کوردستان بەردەوامە لە پڕۆسەی ڕیفۆرم و پەرەپێدانی توانای کارمەندانی وەزارەتەکەی، بۆ ڕووبەڕووبوونەوەی تاوانەکان و تاوانی ڕێکخراو مەمەبەستی پاراستنی هاووڵاتیان، باڵیۆزخانەی فەرەنسا لە بەغدا بە هاوکاریی کونسوڵخانەی فەرەنسا لە هەولێر و هەماهەنگیی وەزارەتی ناوخۆ خولێکی پێنج ڕۆژەی بۆ ژمارەیەک ئەفسەر و کارمەندی وەزارەتی ناوخۆ کردەوە، بۆ ڕووبەڕووبوونەوەی قاچا‌خچێتیکردن بە مرۆڤ و دەستنیشانکردنی بەڵگەنامەی ساختە.

 

لێدوانی فەرمی: هێمن میرانی، بەڕێوەربەری گشتیی دیوان لە وەزارەتی ناوخۆ، لە کۆنگرەیەکی ڕۆژنامەوانی ڕایگەیاند، ئەمڕۆ وەکو بەشێک لە هاوبەشێتی نێوان گەلی فەرەنسا و گەلی هەرێمی کوردستان، ئامادەبووین لە ڕێورەسمی کۆتایهێنان بە خولێکی گرنگی پێنج ڕۆژە کە بۆ 21 ئەفسەر و کارمەند و فەرمانبەری وەزارەتی ناوخۆ، لە بەڕێوەبەرایەتیی نیشنگەی پارێزگای هەولێر، بەڕێوەبەرایەتیی ڤیزە لەناو دیوانی وەزارەت، بەڕێوەبەرایەتیی بەرەنگاربوونەوەی تاوانە ڕیکخراوەکان، لەلایەن باڵیۆزخانەی فەرەنسا لە بەغدا و کونسوڵخانەی فەرەنسا لە هەولێر ڕێکخرا بوو. 

 

گوتیشی: شارەزایانی فەرەنسی لە پاریسیەوە هاتبوون چەندین ڕاهێنانیان بە بەشداربووان کرد لە بەرزکردنەوەی توانای کارمەند و ئەفسەر و فەرمانبەرانی وەزارەت، لە بوارەکانی بەرەنگاربوونەوەی تاوانی ڕێکخراو، لە بواری ناسینەوە و دەستنیشانکردنی بەڵگەنامەی ساختە کە لە ئاستی جیهان کۆمەڵگەی مرۆڤایەتی دەکەنە ئامانج و لە ڕێگەی تۆڕەکانی تاوانەوە هەوڵدەدەن بازرگانی بە مرۆڤ بکەن. لە ئایندەیەکی نزیکیشدا خولی هاوشێوە لە دهۆک، سلێمانی و هەڵەبجە دەکرێتەوە.

 

لەلایەکی دیکەوە: یان برایم، کۆنسوڵی گشتیی فەرەنسا لە هەولێر، ڕایگەیاند کردنەوەی ئەم خولە لەلایەن فەرەنسا نیشانەی دۆستایەتی نێوان هەردوو وڵاتە، فەرەنسا هەمیشە ئامادەیی هەبوو لە ڕووبەڕووبوونەوەی تیرۆر و تاوانەکان، هەروەکو لە ڕابردوو لە شەری داعش ئامادە بووە و ڕۆڵی هەبووە، ئەمڕۆش بۆ بەرەنگاربوونەوەی تاوانی ڕێکخراو ئامادەیە.