ئەمریکا: نیگەرانییەکان لەبارەی مامەڵەی نایاسایی و میلیشیاکان لە عێراقدا بەردەوامن

ئاڤا نیوز

هەڵسوڕێنەری باڵیۆزخانەی ئەمریکا لە بەغدا ڕایدەگەیێنێت، وڵاتەکەی هێشتا نیگەرانە لە مامەڵە داراییە نایاساییەکان لە عێراقدا و هیچ بڕیارێکی نوێ لەبارەی سزاکانی سەر بانکەکان نییە. هاوکات جەخت دەکاتەوە کە بەشداریکردنی گرووپە چەکدارەکان لە حکومەتی نوێدا لەگەڵ هاوبەشیی نێوان بەغدا و واشنتۆن ناگونجێت.

لێدوانی فەرمی: جۆشوا هاریس، هەڵسوڕێنەری باڵیۆزخانەی ئەمریکا لە بەغدا بە میدیاکانی عێراقی ڕاگەیاند، هاوبەشە عێراقییەکان جەخت دەکەنەوە کە دەستوەردان ناکەن و وڵات ناخەنە ناو ئەو ململانێیەی ئێستا لە ناوچەکەدا هەیە و ئاسایش لە سنوورەکانیدا بەردەوامە.

لەهەمان کاتدا: هەڵسوڕێنەری باڵیۆزخانەی ئەمریکا جەختی لەوە کردەوە کە سەرکردەکانی عێراق باش دەزانن بەشداریکردنی گرووپە چەکدارەکان لە حکومەتی نوێدا لەگەڵ هاوبەشیی نێوان بەغدا و واشنتۆن ناگونجێت. ئەو هانی دەوڵەتی عێراق دەدات کە گرووپە چەکدارەکان هەڵبوەشێنێتەوە، چونکە ئەمریکا بەرگری لە خۆی و بەرژەوەندییەکانی لە عێراقدا دەکات.

لەلایەکی دیکەوە: سەبارەت بە پڕچەککردن و دابینکردنی سیستەمەکانی بەرگریی ئاسمانی بۆ هەرێمی کوردستان، هاریس ڕوونیکردەوە کە ئەمریکا بە جددی پابەندە بە سەروەریی عێراق و هەر شتێک کە هەڕەشە لە ئاسایشی وڵات بکات سەرکۆنەی دەکات. گوتیشی، لەگەڵ هاوبەشەکانمان لە بەغدا و کوردستان کاردەکەین بۆ گەڕان بەدوای سیستەمەکانی پاراستنی ژێرخاندا.

لە کۆتاییدا، هەڵسوڕێنەری باڵیۆزخانەی ئەمریکا داوای لە حکومەتەکانی بەغدا و هەرێمی کوردستان کرد کە بە خێرایی لێکۆڵینەوە لە تێوەگلاوانی هێرشەکەی سەر کێڵگەی غازی کۆرمۆر لە سلێمانی بکەن و لێپێچینەوەیان لەگەڵدا بکەن.