نەتانیاهۆ: حەماس دەیەوێت بارمتەکان بۆ ئێران بگوازێتەوە

ئاڤا نیوز

 

بنیامین نەتانیاهۆ، سەرۆکوەزیرانی ئیسرائیل، سووربوونی لەسەر مانەوەی سوپای ئیسرائیل لە ناوچەی فیلادلفی ڕایگەیاند و گوتی، حەماس دەیەوێت لەو سنوورەوە بارمتەکان بۆ ئێران بگوازێتەوە.

 

لێدوانی فەرمی: نەتانیاهۆ لە کۆنگرەیەکی ڕۆژنامەوانیدا گوتی "ئەگەر ئێمە لە سنووری فیلادلفی بچینە دەرەوە، ئەوا ناتوانرێت ڕێگە لە قاچاخیی چەک و بەقاچاخبردنی بارمتەکان بگرین."

 

زانیاریی زیاتر: بە گوێرەی چەند میدیایەکی ئیسرائیل یەحیا سنوار، سەرۆکی مەکتەبی سیاسیی حەماس، پلانی هەبووە خۆی و سەرکردەکانی حەماس و هەروەها بارمتە ئیسرائیلییەکانیش لە ڕێگەی سنووری فیلادلفییەوە بۆ ناوچەی سینا و لەوێشەوە بۆ ئێران بگوازێتەوە.

 

ئەوەی پێویستە بیزانیت: یەکێک لە خاڵە سەرەکییەکانی ناکۆکیی نێوان ئیسرائیل و حەماس لە دانوستانەکانی ئاگربەست پرسی مانەوەی سوپای ئیسرائیلە لە ناوچەی فیلادلفی.