ئەنجوومەنی ئابووریی عێراق و کوردستان بەسەرپەرشتیی سەرۆکوەزیران بارزانی کۆبوونەوە

ئاڤا نیوز 

 

بەسەرپەرشتی سەرۆکوەزیران بارزانی، هەردوو شاندی ئەنجوومەنی ئابووریی حکومەتی هەرێمی کوردستان و ئەنجوومەنی ئابووریی عێراق لە هەولێر کۆبوونەوە.

 

وێنە گەورەکە: ئەمڕۆ یەکشەممە 8-9-2024، سەرۆکوەزیران بارزانی پێشوازی لە شاندی ئابووریی عێراق کرد، هەردوو ئەنجوومەنی ئابووریی هەرێمی کوردستان و ئەنجوومەنی وەزاریی عێراق بۆ کاروباری ئابووری لەبارەی چارەسەرکردنی کێشە هەڵپەسێردراوەکانی نێوان هەولێر و بەغدا،  مافە دەستووریی و شایستە داراییەکان و بەشە بودجەی هەرێمی کوردستان گفتوگۆیان کرد.

 

ئەمەش بزانە: کۆبوونەوەکەی ئەمڕۆ ماوەی سێ کاتژمێری خایاند و پێنج تەوەر لەنێوان هەولێر و بەغدا تاوتوێ کران کە  بریتیبوون لە: بابەتی دەستەبەری بیمەی کۆمەڵایەتی و دۆسیەی دەروازەکان، گومرگ، کشتوکاڵ و بازرگانی، هاوکات بەهێزکردنی هەماهەنگی بۆ زیاتر برەودان بە کەرتی کشتوکاڵ و یەکخستنی ڕێکارەکانیان بۆ قەدەغەکردنی هاوردەی بەرهەمە دەرەکییەکان.

 

زانیاریی زیاتر: کۆبوونەوەکان ماوەی دوو ڕۆژ لە هەولێر بەردەوام دەبن و ئەنجامی کۆبوونەوەکان دەگەڕێنرێتەوە بۆ ئەنجوومەنی وەزیرانی عێراق.