بڕیارەکان لە هەولێر یەکلادەبنەوە

شاندێکی وەزاریی حکومەتی عێراق بۆ یەکلاکردنەوەی بابەتی مووچە و شایستە داراییەکانی هەرێمی کوردستان، ئێستا لە هەولێرە و بەسەرپەرشتیی سەرۆکوەزیران بارزانی لەماوەی دووی ڕۆژدا زنجیرەیەک کۆبوونەوە لەگەڵ حکومەتی هەرێمی کوردستان دەکەن.

‎بڕیارە مانگانە مووچەی فەرمانبەران لە بەغداوە بۆ هەولێر بنێردرێت، بەڵام هەر مانگە و کێشەیەک بۆ ناردنی دروست دەبێت و  هەردوولا  بەغدا و هەولێر یەکتر بە هۆکاری دواکەوتنەکە تۆمەتبار دەکەن. ئەم سەردانە بۆ ئەوەیە چیدی ئەم دواکەوتنانە دووبارەنەبنەوە و مووچە لەکاتی خۆیدا بخرێتە سەر هەژماری وەزارەتی دارایی و ئابووریی هەرێمی کوردستان، وەک هەولێر داوای دەکات.  


ئەم سەردانە کە چاوەڕێ دەکرێت بە قازانجی دەستەبەرکردنی ماف و مووچەی فەرمانبەرانی هەرێمی  کوردستان یەکلاببێتەوە، جارێکی دیکە ئەو ڕاستییە دووپاتدەکاتەوە؛ هەرێمی کوردستان لە چاوی بەغدا و کۆمەڵگەی نێودەوڵەتیشەوە  هەرێمێکی یەکپارچە و یەک ئیدارەیە و هەموو بڕیارەکانیش لە هەولێر یەکلادەبنەوە.

بەداخەوە لە ماوەکانی ڕابردوودا هەندێ دەنگی نەشاز و چەند لایەنێکی نابەرپرسیار لە ناوخۆدا، زۆر هەوڵیاندا ئەم مەرکەزیەت و یەکپارچەییە تێکبشکێنن و  لەناوی ببەن، کە خەونی سەدان ساڵەی گەلی کوردستانە و دوونیایەک قوربانی و خوێنی بۆ دراوە، بەڵام وا ئەمڕۆ بە پێداگری و سیاسەتی شکۆمەندانەی سەرۆکوەزیران بارزانی و بە خۆڕاگری خەڵکی کوردستان و پێداگرییان لەسەر مافەکانیان، جارێکی دیکە ئەو ڕاستییە وەک خۆر درەوشایەوە کە هەولێر و سلێمانی و دهۆک و هەڵەبجە هەر یەکن و کەس ناتوانێت لەیەکیان داببڕێت، گرێکوێرەکانیش دواجار هەر لە هەولێر دەکرێنەوە.

ئەمە ئەو ڕاستییەیە کە بەغدا باش دەیزانێ و هاوکێشە نێودەوڵەتی و هەرێمایەتییەکانیش لەسەر ئەم فاکتە مامەڵە دەکەن. تەنها ئەوە ماوە هێز و لایەنە سیاسییە ناوخۆییەکانیش ئەم ڕاستییە وەک خۆی قبووڵ بکەن و خەباتی چەند ساڵەی خەڵکی کوردستان  بۆ بەدەستهێنانی سەروەری و شکۆمەندی و حکومەتی خۆماڵی،   لەپێناو چەند دەستکەوتێکی شەخسی و حیزبی لەبارنەبەن، کە هەرگیز گوتاری دوولەتکردنی کوردستان سەرکەوتوو نابێت و گەلی کوردستان قبووڵی نییە.