نێچیرڤان بارزانی: شۆڕشی ئەیلوول بنەمای یەکەمی دانپێدانانی مافەکانی گەلی کورد بوو

ئاڤا نیوز 

 

سەرۆکی هەرێمی کوردستان لە یادی شۆڕشی ئەیلوول پەیامێکی بڵاوکردووەتەوە و دەڵێت، شۆڕشی ئەیلوول بووه‌ بنه‌ماى يه‌كه‌مين دانپێدانانى فه‌رمى به‌ مافه‌كانى گه‌لى كوردستاندا و بناغه‌ى هه‌موو ده‌ستكه‌وته‌كانى دواترى.

 

چیرۆکی سەرەکی: 63 ساڵ بەسەر هەڵگیرسانی شۆڕشی ئەیلوول تێدەپەڕێت کە  شۆڕشى هه‌موو گه‌لى كوردستان بوو به ‌هه‌موو پێكهاته‌كانيه‌وه‌، بە سەرکردایەتیی بارزانی نەمر.

 

پەیامی فەرمی: نێچيرڤان بارزانى، سەرۆکی هەرێمی کوردستان، لەو یادەدا دەڵێت: لە ساڵيادى شۆڕشى مه‌زنى ئه‌يلوولدا، بارزانى نه‌مر، ڕابه‌رى شۆڕش و ته‌واوى پێشمه‌رگه‌ قاره‌مانه‌كان و هه‌موو ئه‌و تێكۆشه‌رانه‌ به‌بير ده‌هێنينه‌وه‌ كه‌ هێز و ده‌ست و بازووى‌ شۆڕش بوون و به‌ پێزانين و شكۆدارييه‌وه‌ ياديان ده‌كه‌ينه‌وه‌. دروود بۆ گيانى پاكيان، سڵاو له‌ هه‌موو خه‌باتگێڕانى ئه‌و ڕۆژگاره‌ سه‌خته‌ كه‌ هێشتا له‌ ژياندان. 

 

قووڵتر: شۆڕشى مه‌زنى ئه‌يلوول كه‌ شۆڕشى هه‌موو گه‌لى كوردستان بوو به ‌هه‌موو پێكهاته‌كانيه‌وه‌، بووه‌ كرۆكى بير و ناسنامه‌ى نه‌ته‌وه‌يى و نيشتمانى و شكۆى هه‌موو كوردستانييان و ئيراده‌ى پۆڵايينى گه‌لى كوردستان بۆ به‌ره‌نگاربوونه‌وه‌ى سته‌م و داگيركارى. شۆڕش ده‌نگى زوڵاڵى ئازاديخوازان و دۆزى ڕه‌واى گه‌ل و نيشتمانێک بوو كه‌ له‌پێناو ئازاديدا هه‌موو قوربانييه‌كى به‌خشى. بووه‌ بنه‌ماى يه‌كه‌مين دانپێدانانى فه‌رمى به‌ مافه‌كانى گه‌لى كوردستاندا و بناغه‌ى هه‌موو ده‌ستكه‌وته‌كانى دواترى.

 

 لەلایەکی دیکەوە: لە پەیامەکەی نێچیرڤان بارزانی ئەوەش هاتووە: جه‌خت له‌ ئيراده‌ى پته‌وى گه‌لى كوردستان بۆ پاراستن و به‌ده‌ستهێنانى ته‌واوى مافه‌ ده‌ستوورييه‌كانى و ته‌بايى و پێكه‌وه‌يى له‌نێوان هه‌موو پێكهاته‌كانيدا ده‌كه‌ينه‌وه. ده‌ست به‌ پره‌نسيپ و به‌ها باڵاكانى شۆڕشه‌وه‌ ده‌گرين له‌ خه‌بات و تێكۆشان و كۆڵنه‌دان له‌پێناو ئازادى و ديموكراسيدا و به‌ ئومێد و گه‌شبينييه‌وه‌ تا گه‌يشتن به‌ سه‌ركه‌وتن و به‌ديهێنانى خه‌ونى شه‌هيدان، به‌ره‌و داهاتوويه‌كى باشتر، به‌رده‌وام ده‌بين.