پارێزگاری هەولێر: پڕۆژەکانی هەولێر پەیوەندی بە هەڵمەتی هەڵبژاردنەوە نییە

ئاڤا نیوز 

لە سنووری شاری هەولێر کۆمەڵێک پڕۆژەی گەورە و بچووک جێبەجێ کراون، بەشێک لە لایەنەکان بە بانگەشەی هەڵبژادن ناوی دەبەن.

 

لێدوانی فەرمی: ئومێد خۆشناو، پارێزگاری هەولێر، ڕایگەیاند: پڕۆژەی خزمەتگوزاری و ستراتیژی لە سنووری پارێزگای هەولێر، هیچ پەیوەندی بە هەڵمەتی هەڵبژاردن نییە و ئێمە سەرەڕای هەبوونی قەیرانی دارایی و تەنگەژەی سیاسی بەردەوام هەوڵمان داوە خزمەتی هاووڵاتیان بکەین لە ڕێگەی پڕۆژەکانی پەیوەست بە ژیانی هاووڵاتیان لەسەر بودجەی پارێزگای هەولێر و شارەوانییەکان.

 

لەلایەکی دیکەوە: پارێزگاری هەولێر، باسی لەوە کرد، هەندێک لایەن دەیانەوێت لە گرنگی پڕۆژەکانی هەولێر کەم بکەنەوە بە خەڵک دەڵێن پڕۆژەکان تەنیا بۆ هەڵمەتی هەڵبژاردنە، ئاگاداری ئەوە نین لە چوار ساڵی ڕابردوو بەردەوام پڕۆژە لە سنووری پارێزگای هەولێر کراوە، نوێترین پڕۆژەش کە گەورەترین پڕۆژەیە لە هەرێمی کوردستان ئەویش پڕۆژەی گەیاندنی ئاوی خێرایە بۆ ناو شاری هەولێر کە بە فەرمانی سەرۆکوەزیران مەسرور بارزانی کراوە.