هۆکاری دوورخستنەوەی ئەزهەرییەکان لە ڕیزی سەرایا سەلام ئاشکرا دەکرێت

 

ئاڤا نیوز

 

بەهۆی ڕێگریکردن و ڕووبەڕووبوونەوەی چەکدارییان لەگەڵ کاروانی ئۆتۆمبێڵەکانی عەبدولئەمیر ئەلشەمەری، وەزیری ناوخۆیی عێراق، موقتەدا سەدر ئەزهەرییەکان لە ڕیزەکانی سەرایا سەلام دوور دەخاتەوە.

 

وێنە گەورەکە: لە ڕۆژی 13-9-2024، موقتەدا سەدر، سەرۆکی ڕەوتی نیشتمانی شیعە فەرمانی بە تەحسین محەمەداوی، فەرماندەی سەرایا سەلام کرد،  سەمەد ئەبو کازم فەرتووسی، سەرکردەی ئەزهەرییەکان  دووربخاتەوە و چەکی بکات. 

 

 

زانیاریی بەدەستهاتوو: بەگوێرەی سەرچاوە عێراقییەکان، هۆکاری دوورخستنەوەی ئەزهەرییەکان لە ڕیزی سەرایا سەلام  بۆ ڕێگریکردنیان بووە لە کاروانێکی ئۆتۆمبێلی وەزیری ناوخۆی عێراق لە پارێزگای سەڵاحەددین کە بووەتە هۆی درووستبوونی شەڕ و پێکدادان.

 

ئەوەش بزانە: شەوی ڕابردوو سەدر پەیوەندی بە شەممەری کردووە و "داوای لێبوردنی لێکردووە".

 

باکگراوەند: دەستەواژە و نازناوی گرووپی ئەزهەرییەکان دەگەڕێتەوە بۆ ئەزهەر دلێمی کە لە ساڵی 2007 بەدەستی هێزەکانی ئەمریکا لە ناوچەی سەدری بەغدا کوژرا، لە ساڵی 2014 ــەوە لەلایەن سەمەد ئەبو کازم فەرتووسی ڕابەرایەتی دەکرێت.