نێچیرڤان بارزانی: سەقامگیریی عێراق کلیلەکەی چارەسەرکردنی کێشەکانی هەولێر و بەغدایە

ئاڤا نیوز

 

سەرۆکی هەرێمی کوردستان دەڵێت، پرسی ئاشتی و سەقامگیریی عێراق کلیلەکەی چارەسەری ئەو کێشانەیە کە لەنێوان هەولێر و بەغدا هەن.

 

چیرۆکی سەرەکی:  بەئامادەبوونی سەرۆک بارزانی و سەرۆکوەزیران مەسروور بارزانی و 150 سەرکردەی، ناوەخۆیی، هەرێمی و نێودەوڵەتی لە 25 وڵاتی جیاواز، ڕۆژی دووشەممە 17-11-2025، شەشەمین کۆڕبەندی ئاشتی و ئاسایشی ڕۆژهەڵاتی ناوەڕاست، لە زانکۆی ئەمریکی دهۆک دەستیپێکرد و بۆ ماوەی سێ ڕۆژ بەردەوام دەبێت.

 

لێدوانی فەرمی: نێچیرڤان بارزانی، سەرۆکی هەرێمی کوردستان لە پەراوێزی کۆڕبەندی مێپس 2025 لە شاری دهۆک ڕایگەیاند، کلیلی چارەسەری کێشەکانی نێوان هەولێر و بەغدا، پرسی ئاشتی و سەقامگیریی عێراقە.

 

سەرۆکی هەرێمی کوردستان دەڵێت، ئەگەر بە جددی عێراق هەوڵ بدات ئەو کێشانە چارەسەر بکات، لەڕووی سیاسییەوە دەچێتە قۆناغێکی ڕاستر و سەرکەوتووتر لەوەی ئێستا. دەشڵێت، دوای ماوەیەکی زۆر لە ململانێ و کێشە، "هیوادارین هەموو لایەک گەیشتبنە ئەو بڕوایەی کە دەبێت کێشەکان چارەسەر بکرێن".

 

زانیاریی زیاتر: لە بەشێکی دیکەی قسەکانیدا، نێچیرڤان بارزانی گوتی، "هیوادارین هەموو هێزە عێراقییەکان وانەیەکیان لە ڕابردوو وەرگرتبێت و قۆناغی داهاتوو ناوبنێن قۆناغی جێبەجێکردنی دەستووری عێراق، هەروەها قۆناغی چارەسەرکردنی هەموو ئەو کێشانەی لەگەڵ هەرێمی کوردستان هەیەتی".