سەدر داوایەک ئاڕاستەی خاوەن کاروانی حوسەینییەکانی عێراق دەکات

ئاڤا نیوز

 

ڕێبەری ڕەوتی نیشتمانیی شیعە داوا لە خاوەن کاروانی حوسەینییەکانی عێراق دەکات، کاروانەکانیان بەڕووی ئاوارە لوبنانییەکاندا بکەنەوە.

 

وێنە گەورەکە: موقتەدا سەدر، ڕێبەری ڕەوتی نیشتمانی شیعە لە بەرامبەر دۆخی خەڵکی لوبنان بەهۆی هێرشەکانی ئیسرائیل پەیامێکی بڵاوکردەوە و چەند داوایەک ئاڕاستەی خاوەن کاروانی حوسەینییەکان و سەرمایەدارانی عێراق دەکات.

 

بڵاوکراوەی فەرمی: سەدر لە پەیامەکەیدا، داوا لە سەرجەم خاوەن کاروانی حوسەینییەکانی سەر ڕێگای کەربەلا دەکات کاروانەکانیان بەڕووی ئاوارە لوبنانییەکاندا بکەنەوە.

 

زانیاریی زیاتر: سەدر داوایەکیش ئاڕاستەی سەرمایەداران دەکات، هاوکاری دارایی و مرۆیی لە بارەگای بونیان ئەلمەرسووس لە شاری نەجەف کۆبکەنەوە بۆ کردنەوەی ئەو کاروانانە و هاوکاریکردنی بریندار و ئاوارە لوبنانییەکان. 

 

ئەوەش بزانە: کاروانی حوسەینییەکان ئەو کەسانەن لە یادی عاشوورا و چلەی ئیمامی حوسێن لە سەر ڕێگای کەربەلا  و پارێزگاکانی عێراق خێمە هەڵدەدەن و خزمەتگوزاری پێشکەش بە زیارەتکاران دەکەن. 

 

باکگراوند: بونیان ئەلمەرسووس دەزگایەکی سەر بە ڕەوتی نیشتمانی شیعەیە کە تایبەتە بەکاروباری گەنجان و چالاکییە کۆمەڵایەتییەکانی ڕەوتەکە.