ئیسرائیل: تەنیا لە ڕۆژێکدا 300 مووشەکمان لە لوبنانەوە ئاراستەکراون

ئاڤا نیوز

 

گوتەبێژی سوپای ئیسرائیل ڕایدەگەیێنێ، تەنیا لە ڕۆژێکدا 300 مووشەکیان لەلایەن حیزبوڵڵای لوبنانەو ئاراستەکراون،  ئاماژە بۆ ئەوەش دەکات، سەرنجیان لەسەر لێدانی توانا ستراتیژییەکانی حیزبوڵڵایە کە مەترسی لەسەر ئیسرائیل دروست دەکەن.

 

وێنە گەوەرەکە: تاوەکو دێت گرژیی و ناکۆکییەکانی نێوان سوپای ئیسرائیل و حیزبوڵڵای لوبنان هەڵکشانی زیاتر بەخۆیەوە دەبینێت، لە ماوەی چەند ڕۆژی ڕابردوودا ئیسرائیل سەدان پێگەی حیزبوڵڵای لە خاکی لوبنان کردووەتە ئامانج و لە بەرامبەریشدا حیزبوڵڵا هێرشی پێچەوانە دەکاتە سەر ئیسرائیل.

 

لێدوانی فەرمی: دانیال هاگار، گوتەبێژی سوپای ئیسرائیل ڕایگەیاند: تواناکانی حەماسمان لەناوبردووە و ئێستا سەرنجمان لەسەر نەهێشتنی سەرکردەکانی بزووتنەوەکە و لێدانە لە توانا ستراتیژییەکانی حیزبوڵڵا کە مەترسی لەسەر ئیسرائیل دروست دەکەن.

 

بەگوتەی هاگاری: "حیزبوڵڵا ناوچەی باشووری لوبنانی کردووە بە ناوچەی شەڕ، چەندین ئۆتۆمبێلی بارهەڵگری لەنێو ئەو ماڵانەدا شاردووەتەوە کە خەڵکی سڤیلیان تێدایە لە باشووری لوبنان، هاوکات هەزاران ماڵیان لە ناوچەی باشووری لوبنان کردووە بە حەشارگە".، 

 

لەلایەکی دیکە: گوتەبێژی سوپای ئیسرائیل ڕایگەیاند: تا ئێستا سەرقاڵی لێکۆڵینەوەین لە ئەنجامی ئەو گورزانەی کە لەم دواییە ئاراستەی حیزبوڵڵامان کرد". لەبارەی دۆخی ناوخۆی وڵاتەکەیشی گوتی: "ئامانجی کۆتاییمان گەڕاندنەوەی دانیشتووانی باکووری ئیسرائیلە بۆ سەر ماڵ و حاڵی خۆیان" کە بەهۆی شەڕەوە هەزاران کەس ماڵ و حاڵیان جێهێشتووە.