هاوسەنگی و بەرپرسیارێتی لە وتارەکەی بارزانی دا

ئاڤا نیوز

 

دوێنێ لە شاشەی تەلەڤیزیۆنەوە گوێم لەو وتارەی سەرۆک بارزانی گرت کە لە ئاهەنگی دەستپێکی بانگەشەی هەڵبژاردندا پێشکەشی سەرکردایەتی و کادرو کاندیدەکانی پارتیی کرد.  دواتریش دەقی وتارەکەم بە تێکست دەستکەوت و چەند جارێک بە سەرنجەوە خوێندمەوە. ئەوەی زۆر سەرنجی ڕاکێشام لەو وتارەدا دوو خاڵی زۆر گرنگ بوون (هاوسەنگی و بەرپرسیارێتی ).

یەکەم: هاوسەنگیی بەواتا ڕاگرتنی باڵانس و خۆ بەدوورگرتن لە پەڕگیری و زیادەڕۆیی (  الاتزان و الابتعاد عن التطرف و المبالغة ) بریتییە لە خستنەگەڕی ژیری و حیکمەت و ئەزموون چ لە گوفتار و چ لە ڕفتاردا .. ‌هاوسەنگی لە ئاخاوتن و دەنگ و جووڵەی هەر سیاسەتمەدار و سەرکردەیەکدا کت و مت ڕەنگدانەوەی شەخسیەت و ئاستی پەنابردنێتی بۆ ئەقڵ و لۆژیک و خۆ بەدوورگرتنی لە هەڵچوونی کاتی و خۆ ڕادەست نەکردنێتی بە دیمەنی پڕ لە خۆویستیی سەر ستەیج و حەماسەت و چەپڵە ڕێزان و هوتافکێشانی جەماوەری ڕووبەڕووی !

سەرکردەی مێژووکردی وەک بارزانی، پێشتر و لە کەشێکی ئارام و ئاساییدا بڕیار دەدات چی دەڵێت و چۆن دەیڵێت و لەکوێ و بۆ کێ وتار دەدات. هەرگیز کۆنتڕۆلی خۆی ناداتە دەست هەڵچوون و ‌هەیەجان و حەماسەتی ئەو ساتە وەختەی کە وتارەکەی تێدا دەدات.. 
دیوێکی تری هاوسەنگیی لە وتارەکەی بارزانی دا، لەوەدا ڕەنگی دابۆوە کە نە لە پیاهەڵدانی حیزبەکەی خۆیدا زیدەرۆیی کرد، نە هیچ لایەن و کەسێکی بە کەم سەیرکرد.. هەم لە وەسفی پارتیدا میانەڕۆ بوو هەم لە وەسفی ئەوانیتردا. بە ڕاشکاویش داوای لە بەربژێرەکانی حیزبەکەی کرد بەهیچ جۆرێک پەیمان و بەڵێنێک بە خەڵک و دەنگدەرانیان نەدەن کە زیادڕۆیی تێدا بێت و لە پاشەڕۆژدا خۆشیان و حیزبەکەشیان نەتوانن لەژێر قورسایی ئەو بارە دەرچن. 

دووەم: بەرپرسیارێتی لە ڕاستگۆیی و تێگەیشتنی قووڵەوە سەرچاوە دەگرێت. جەنابی بارزانی لەو وتارەیدا هەم ڕاستگۆیانە و هەم لە تێگەیشتنێکی قووڵەوە بۆ هاوکێشە و جەمسەربەندییەکانی ناو هەرێم و عێراق و ناوچەکە، بەرپرسیارانە و دوور لە موزایەدە و پێفرۆشتنەوە بۆ بەربژێران و ئەندام و لایەنگرانی پارتی دەدوا. تۆمەتی نەدایە پاڵ هیچ کەس و لایەنێک، تەنها بە زمانێکی سادە و کوردانە لە ڕونگەی خۆیەوە وەسفی کردن و نە سووکایەتیی بەکەس کرد. نە وشەیەکی لەزار دەرچوو کە دواتر لێی پاشگەزببێتەوە. بە ڕوونی ئایندەی لە پێش چاوبوو. هیوای بە دواڕۆژ بەتین بوو . لەئێستاوە بەرپرسیارێتییەکی گەورەی خستە ئەستۆی بەربژێرەکانی پارتی و هانی دان لە ئاستیدا بن .
دیوێکی دیکەی ڕەنگدانەوەی بەرپرسیارێتی لەو وتارەدا بەخشینەوەی ئینێرجی و وزەو ورەیەکی پۆزەتیڤی کوردانە بوو بەسەر هەموو ئامادەبووان و بینەرو بیسەرانی وتارەکەدا کە لە ناخێکی پڕ لە ئەزموونی خۆڕاگرییەوە سەرچاوەیان گرتبوو. 

بەپاڵ هەموو ئەوانەوە پەیوەست بوونی سەرۆک بە ڕەوشت و داب و نەریتیی ڕەسەنی کوردایەتی و کوردەوارییەوە فاکتەرێکی هەرە گرنگی وتاردانێکی سەرکەوتووی ئامانج پێک بوو. چونکە زۆربەی سیاسەتمدارو سەرکردەکانی خۆرهەڵاتی ناوەراست لە بارودۆخ و کەشی پڕ لە هەڵچوونی بانگەشەی هەڵبژاردندا کۆنترۆڵ لەدەست دەدەن و توانای هەڵاوێردکردنی  وشەو دەربڕینەکانیان نامێنێ ئیتر هەرچی بەدەمیاندا بێت دەیڵێن ...