چوارچێوەی هەماهەنگی کۆبوونەوەی خێرا دەکات

ئاڤا نیوز

هاوپەیمانیی چوارچێوەی هەماهەنگی کۆبوونەوەیەکی خێرای کرد دەربارەی پێشهاتەکانی دوای کوژرانی حەسەن نەسروڵڵا، ئەمینداری گشتیی حیزبوڵڵای لوبنان و پشتیوانیی خۆی بۆ لوبنان دووپاتکردەوە.

 

وێنە گەورەکە: کوژرانی حەسەن نەسروڵڵا کاردانەوەیەکی گەورەی بەدوای خۆیدا هێنا  و نیگەرانیی لای هێزە سیاسییەکانی شیعە و گرووپە چەکدارەکان لە عێراق دروستکرد و لەمبارەیەوە، سەرکردەکانی چوارچێوەی هەماهەنگی لە نووسینگەی سەرۆکوەزیرانی عێراق کۆبوونەوە.

 

ڕاگەیێنراوی فەرمی: چوارچێوەی هەماهەنگی لە بەیاننامەیەکدا، کوشتنی حەسەن نەسروڵڵای بە سەرەتای سەرکەوتن و ژیانێكی نوێی میللەتانی موسڵمان وەسف کرد و پابەند بوونی خۆی بۆ ڕێنماییەکانی مەرجەعییەتی باڵا لە یارمەتیدانی گەلی لوبنان دووپاتکردەوە، هاوکات سوپاسی هەوڵەکانی حکومەتی عێراقی کرد لە پێشکەشکردنی ئاسانکاریی بۆ ئاوارەکانی لوبنان.

 

ئەوەی پێویستە بیزانیت: ئەمڕۆ شەممە، کەتیبەکانی سەیدی شوهەدا لە عێراق بە ئاڤای ڕاگەیاند: ئێمە وەک کەتیبەکانی سەید شوهەدا و بەرەی مقاوەمە لە باری جەنگداین، هەر لە فەلەستین و لوبنان و یەمەن تاوەکو عێراق وڵاممان پێشبینیکراو دەبێت.