بەریتانیا: کاتی ئەوەیە عێراقییەکان دۆسیەی ئەمنی وڵاتەکەیان بەڕێوەببەن

ئاڤا نیوز

 

لەگەڵ ڕاگەیاندنی وادەی کۆتاییهاتنی هاوپەیمانی نێودەوڵەتی دژی داعش لە عێراق، وەزارەتی بەرگری بەریتانیا ستایشی ئازایەتی و ڕۆڵی پێشمەرگە و هێزە ئەمنییەکان دەکات و جەختیش دەکاتەوە کە ئێستا کاتی ئەوەیە عێراقییەکان دۆسیەی ئەمنی وڵاتەکەیان بەڕێوەببەن.

 

وێنە گەورەکە: هاوپەیمانی نێودەوڵەتی ساڵی 2014 بەسەرۆکایەتی ئەمریکا بۆ ڕووبەڕوبوونەوەی داعش لە عێراق و سوریا پێکهێنرا و 82 دەوڵەتی جیهان بەشدارییان تێداکرد، بەهاوکاری ئەو هاوپەیمانییەش ساڵی 2017 عێراق کۆتاییهاتنی داعشی ڕاگەیاند، بڕیاریشە تا کۆتایی ساڵی داهاتوو ئەرکی هاوپەیمانێتییەکە لە عێراق کۆتایی بێت.

 

ڕاگەیێنراوی فەرمی: وەزارەتی بەرگری بەریتانیا لە ڕاگەیەنراوێکدا ئاماژەی بەوەدا، لە 10 ساڵی ڕابردوودا و لە چوارچێوەی ئەرکی هاوپەیماناندا، ڕاهێنانیان بە 111 هەزار ئەندامی هێزە ئەمنییەکانی عێراق کردووە کە لەناویاندا 21 هەزار پێشمەرگە هەبووە، ڕاهێنانەکانیش بریتی بوون لە ئاشنابوون بە بنەما سەربازییەکان، چاککردنەوەی چەک، پووچەڵکردنەوەی بۆمبی چێنراو و ژمارەیەک ڕاهێنانی تەندروستی و ئەندازیاری.

 

زانیاریی زیاتر: وەزارەتی بەرگری بەریتانیا ئەوەشی خستەڕوو "بە ئازایەتی و چالاکی هێزە ئەمنییەکانی عێراق و هێزەکانی پێشمەرگە و بەردەوامی هاوکاری هاوپەیمانان، داعش لە ئاستی هەرێمیی لەناوبرا و لە ناوچە ئازادکراوەکانیی عێراقیش ئاوەدانی و گەیاندنی خزمەتگوزاری دەستیپێکردووەتەوە، بۆیە ئێستا دەکرێت پڕۆسەی گواستنەوەی ئەمنی ئەنجام بدرێت و عێراق خۆی سەرکردایەتی دەکات".

 

لەلایەکی دیکەوە: وەزارەتی بەرگری بەریتانیا جەختیش دەکاتەوە کە پابەند دەبێت بە لەناوبردنی داعش و پاراستنی ئاسایشی عێراق و ناوچەکە، لە قۆناغی داهاتووشدا کاردەکات بۆ پتەوکردنی پەیوەندییە دوو قۆڵییەکانی نێوان هەردوو وڵات بەجۆرێک بۆ عێراق بچێتە خزمەت ئارامی درێژخایەنەوە.