هۆشدارییەکی "مەترسیدار" لە پەرلەمانتارێکەوە بۆ سەرۆکوەزیرانی عێراق

ئاڤا نیوز

 

پەرلەمانتارێک دوایین هۆشداری بە سەرۆکوەزیرانی عێراق دەدات لەبارەی بوونی چوار هەزار تۆن ماددەی تەقێنەر لە بەندەرەکانی عێراق و ئاماژە بۆ ئەوە دەکات "پێش سێ ڕۆژ زانیاریی زۆر مەترسیداری" داوەتە سەرۆکوەزیران و تاوەکو بەیانی کاتژمێر 10:00ـەش مۆڵەتی پێدەدات و دەڵێ: "وام لێ مەکە زانیارییەکان بۆ ڕای گشتی ئاشکرا بکەم".

 

بڵاوکراوەی فەرمی: یاسر هاشم حوسەینی، ئەندامی پەرلەمانی عێراق لە پۆستێکیدا لە تۆڕی کۆمەڵایەتی فەیسبووک نووسیویەتی: "دوایین هۆشداری بۆ سەرۆکی ئەنجوومەنی وەزیران، پێش سێ ڕۆژ زانیاریی زۆر مەترسیدارم پێتدا. ئەو چوار هەزار تۆنە توانای تەقاندنەوەی دامەزراوە نەوتییەکان و ئەو پرۆژانەی هەیە کە ئابووری وڵات ئیفلیج دەکەن و گیانی ملیۆنان کەس دەخەنە مەترسییەوە".

 

زانیاریی زیاتر: پەرلەمانتارەکە ڤیدیۆیەکی تەقینەوەکەی بەندەری حودەیدەی یەمەنی داناوە و ئەوەشی نووسیوە: "وام لێ مەکە ئەو باسە بۆ ڕای گشتی بگوازمەوە، بۆیە تاوەکو کاتژمێر 10ی بەیانی مۆڵەتت پێدەدەم". دەشڵێ: "کات تێدەپەڕێت و دوژمن بەردەوامە و دۆخەکەش وەک خۆیەتی، قبووڵ ناکەم وەک ئەوەی ئەم ئێوارەیە لە بەندەری حودەیدە ڕوویدا، ڕووبدات".

ئەوەی پێویستە بیزانیت: ئێوارەی ڕۆژی یەکشەممە فڕۆکە جەنگییەکانی ئیسرائیل هێرشیان کردە سەر حودەیدە لە ڕۆژئاوای یەمەن و ئامانجەکەشیان لێدان بووە لە بەندەری حودەیدە و وێستگەی کارەباو عەمبارە نەوتییەکانی ئەو وڵاتە.