سوپای عێراق دەخرێتە حاڵەتی ئامادەباشییەوە

ئاڤا نیوز

 

سەرۆکایەتی ئەرکانی سوپای عێراق کۆبووەوە و دۆخی ئەمنی ناوچەکەی تاوتوێکرد، جەختیشی لە ئامادەباشی سوپا بۆ هەر ئەگەرێک و  وڵاتپارێزی بەرامبەر هەر حاڵەتێکی لەناکاو کردەوە.

 

وێنە گەورەکە: بۆردومانەکانی ئیسرائیل بۆسەر پێگەی گرووپە چەکدارییەکان لە لوبنان و سوریا بەردەوامە، مەترسیش هەیە بەهۆی بەردەوامی هێرشەکانی بەرەی مقاوەمەی عێراق، ئیسرائیل بارەگای ئەو گرووپانەش بکاتە ئامانج ئەوەش گرفت بۆ دۆخی ئەمنی عێراق دروستدەکات.

 

ڕاگەیێنراوی فەرمی: سەرۆکایەتی ئەرکانی سوپای عێراق بڵاویکردەوە، بەسەرۆکایەتی عەبدولئەمیر یاڕەڵڵا، سوپاسالاری عێراق کۆبوونەوەیەکی ئەمنی بەبەشداری فەرماندەکانی هێزی ئاسمانی، وشکانی و پلاندانان و چەند بەرپرسێکی تر ئەنجامدراوە.

 

زانیاریی زیاتر: "لەکۆبوونەوەکەدا دۆخی ئەمنی و ئەو ئاستەنگییانەی ڕووبەڕووی ناوچە بووەتەوە تاوتوێکران، هاوکات فەرماندەکان باسیان لە ئامادەیی هێزە ئەمنییەکان بۆ دابینکردنی ئاسایشی وڵات بە باشترین شێوە، ئاگاداربوون و ئامادەکاریی بۆ هەر ئەگەرێکی لەناکاو کرد".