تورکیا داوا لە ئیسرائیل دەکات سوپا لە لوبنان بکشێنێتەوە

ئاڤا نیوز 

 

وەزارەتی دەرەوەی تورکیا ڕاگەیێنراوێکی دژی هێرشە زەمینییەکەی ئیسرائیل بۆ سەر خاکی لوبنان بڵاودەکاتەوە، ئەو هەنگاوەی ئیسرائیل بە هەوڵێکی داگیرکاری و نایاسایی بۆ وەدەرنانی خەڵکی لوبنان ناودەبات.

 

وێنە گەورەکە: وڵاتی تورکیا خۆی بە بەرگریکاری دۆزی غەززە و گرووپە چەکدارەکانی حەماس و حیزبوڵڵا ناودەبات، جارێکی دیکە بە توندی سەرکۆنەی ئیسرائیل دەکات و بە تێکدەری سەقامگیری ڕۆژهەڵاتی ناوەڕاست ناوی دەبات.

 

ڕاگەیێنراوی فەرمی: وەزارەتی دەرەوەی تورکیا ڕایگەیاند: "هێرشی زەمینی ئیسرائیل بۆ سەر خاکی لوبنان هۆکارێکە بۆ دەرکردنی خەڵکی وڵاتەکە و ئاوارەبوونیان، ئەمەش هەوڵێکی داگیرکاری نایاساییە، کە پێویستە بە زووترین کات کۆتایی پێ بهێنرێت و سەربازەکانی ئیسرائیل لە خاکی لوبنان بکشێنەوە".

 

ئەمەش بزانە: لە بەشێکی دیکەی بڵاوکراوەکەدا هاتووە: ئەنجوومەنی ئاسایشی نەتەوە یەکگرتووەکان دەبێت پابەندی یاسا نێودەوڵەتییەکان بێت و ڕێوشوێنی پێویست لە بەرامبەر ئەو هێرشە داگیرکاریە بگرێت. هەروەها هەر تاوانێک کە ئیسرائیل ئەنجامی دەدات، گورزێکە لە یاسا نێودەوڵەتییەکان.

 

لەلایەکی دیکەوە: تورکیا داوای ئاگربەستی هەمیشەیی غەززە دەکات بۆ وەستاندنی کۆمەڵکوژییەکانی ئیسرائیل.