وانەبێژانی زانکۆ و پەیمانگەکان کەی مووچەی گرێبەست وەردەگرن؟

ئاڤا نیوز

 

بە فەرمانی سەرۆکوەزیران مەسرور بارزانی، مامۆستایانی وانەبێژی خوێندنی باڵا بەگرێبەست کران، چوار هەزار و 104 مامۆستای وانەبێژ لە زانکۆ و پەیمانگە حکومییەکانی هەرێمی کوردستان دەگرێتەوە، مووچەکانیان لەسەر میلاکی وەزارەتی خوێندنی باڵا و توێژینەوەی زانستی دەبێت.

 

ئەوەی پێویستە بیزانیت: بەگوێرەی بڕیاری ئەنجوومەنی وەزیران، دەبێت پێشوەختە وردبینی تەواو لە لیستەکان بکرێت بۆ ئەوەی هیچ ناوێک لە زانکۆ و پەیمانگەکان و دامودەزگاکانی دیکەی حکومەت دووبارەنەبێتەوە و مووچەی دیکەیان نەبێت.

 

لێدوانی فەرمی: د. توانا نەجەف، سەرۆکی دیوانی وەزارەتی خوێندنی باڵا و توێژینەوەی زانستی بە ئاڤا نیوزی ڕاگەیاند، "بەستنی مووچەی مامۆستایانی وانەبێژ دەکەوێتە دوای مووچەی مانگی 10، چونکە دەبێت دوو نووسراو بۆ وەزارەتی دارایی و بایۆمەتری بکرێت ئەم پرۆسەیەش کاتی دەوێت."

 

زانیاریی زیاتر: نووسراوێک ئاراستەی بایۆمەتری دەکرێت بۆ دڵنیابوونەوە لەوەی ئەو وانەبێژانە لە هیچ دامودەزگایەکی دیکە دانەمەزراون و مووچەی دیکەیان نییە، هاوکات بۆ جێبەجێکردنی تەرخانی دارایی نووسراوێک ئاراستەی وەزارەتی دارایی و ئابووری دەکرێت.

 

ئەمەش بزانە: دوای بەستنی مووچەکانیان، مامۆستایانی گرێبەستی خوێندنی باڵا بەگوێرەی بڕوانامەکانیان مووچەیان لە 600 هەزارەوە دەست پێدەکات تاوەکو یەک ملیۆن و 250 هەزار دینار.