بانكی ناوەندیی عێراق بانكە ئەهلییەكانی بە زیاتر لە 34 ملیار سزا داوە

ئاڤا نیوز

لەماوەی سێ مانگی كۆتایی ساڵی ڕابردوودا، بانكی ناوەندیی عێراق، بە زیاتر لە 34 ملیار دینار سزا و پێبژاردنی بەسەر بانكە ئەهلییەكان و دامەزراوە داراییەكاندا سەپاندووە.

وێنە گەورەكە: بانكی ناوەندیی عێراق بە پشتبەستن بە بنەمای شەفافییەت و ڕۆڵی سەرپەرشتیاری چاودێریکردن که‌ بەسەر بانکەکان و دامەزراوە داراییە نابانکییەکاندا هه‌یه‌تی، سزای دارایی و كارگێڕی بەسەر بانكەكان و دامەزراوە كەمتەرخەمەكان دەسەپێنێت، ئەوەش لەپێناو دڵنیابوون لە پابەندبوون و چوونه ‌ژێرباری گوێڕایه‌ڵی یاسا و ڕێنمایی و مەرجەکانی ڕێکخستنی کارەکانیان بە مەبەستی بونیادنانی کەرتێکی بانکیی تۆکمە و سەقامگیر.

زانیاریی زیاتر: لقی هەولێری بانكی ناوەندیی عێراق، به‌پێی خشتەیەک کۆی گشتیی بڕی پێبژاردن و سزا داراییەکان و ژمارەی سزا کارگێڕییەکانی خستووەتە ڕوو كە لە وەرزی چوارەمی چاودێریكردندا ئاراستە‌ی بانکەکان و دامه‌زراوه‌ داراییە نابانکییەکانی كردووە.

وردەكاری وەرزی چوارەمی سزا داراییەكان بەمشێوەیە؛ 

لە مانگی 10ـی ساڵی ڕابردوو؛ شەش سزای كارگێڕی بە بڕی نۆ ملیار و 664 ملیۆن و 645 هەزار دینار بەسەر بانكەكان و دامەزراوە بانكییەكان سەپاندووە.

لە مانگی 11ـدا؛ سێ سزای كارگێڕی بە بڕی پێنج ملیار و 988 ملیۆن و 425 هەزار دینار بەسەر بانكەكان سەپاندووە.

لە مانگی 12ـدا؛ 13 سزای كارگێڕی بە بڕی 18 ملیار و 763 ملیۆن و 429 هەزار دینار بەسەر بانك و دامەزراوە داراییە بانكییەكاندا سەپاندووە.

كۆی گشتیی سزاكان دەكاتە 34 ملیار و 416 ملیۆن و 500 هەزار دینار.