عێراق: ئاسمانی وڵاتەکەمان بە تەواوەتی پارێزراو نییە

ئاڤا نیوز

 

فەرماندەیی گشتی هێزە چەکدارەکانی عێراق دووپاتی دەکاتەوە سەرجەم ڕێکارەکانیان بۆ پاراستنی ئاسمانی عێراق گرتووەتەبەر و ئاماژە بۆ ئەوەش دەکات، وڵاتەکەیان توانای ئەوەی هەیە چاودێری ئاسمانەکەی و فڕۆکە نێوخۆیی و دەرەکییەکانیش بکات.

 

وێنە گەورەکە: هەڕەشەی گرووپە چەکدارییەکانی عێراق بەردەوامە بۆسەر ئیسرائیل و وڵاتەکەش چەندین جار هۆشداریداوە لە تۆڵەکردنەوە و هێرشکردن سەر ئەو گرووپانە. 

 

لێدوانی فەرمی: لیوا یەحیا ڕەسوڵ، گوتەبێژی فەرماندەیی گشتی هێزە چەکدارەکانی عێراق بە ئاژانسی فەرمی عێراقی ڕاگەیاند: "ئاسمانی عێراق بە تەواوەتی پارێزراو نییە، بەڵام لەگەڵ ئەوەش سەرجەم ڕێککارەکان گیراونەتە بەر بۆ پاراستنی ئاسمانی عێراق".

 

زانیاریی زیاتر: سەبارەت بە پاراستنی سنوورەکانیش یەحیا ڕەسوڵ گوتی: "سنوورەکان بەشێوەکی باش پارێزراون بە تایبەت ئەو سنوورەی لەگەڵ سووریا هەمانە".

 

باکگراوەند: چەند جارێک گرووپە چەکدارییە شیعییەکان لە عێراقەوە درۆنیان ئاڕاستەی ئیسرائیل کردووە بەمەبەستی زیان گەیاندن بە ژێرخانی سوپای ئەو وڵاتە، کۆتا هێرشی بەرەی مقاوەمەی ئیسلامی عێراق دوێنی هەینی بوو، کە لەڕێگەی درۆنێکەوە بنکەیەکی سەربازی سوپای ئیسرائیلی بە ئامانجگرت و لە ئەنجامدا دوو سەرباز کوژران و 25ی دیکەش برینداربوون. 

 

ئەمەش بزانە: چەند جارێک سوپای ئیسرائیل هەڕەشەی وڵامدانەوەی توندی کردووە لەو گرووپە چەکدارییانەی کە وڵاتەکەیان بە ئامانج دەگرن، باس لەوەش کراوە ئیسرائیل دەستی دەگات بە هەرشوێنێک کە هەڕەشە بێت لەسەر سەقامگیری وڵاتەکەی.