عێراق هەڵوەشانەوەی نزیکەی 60 تۆڕی نێودەوڵەتی ماددە هۆشبەرەکان ڕادەگەیێنێت

ئاڤا نیوز

 

هێزە ئەمنییەکانی عێراق لە هەڵمەتێکی یەک ڕۆژیدا نزیکەی 60 تۆڕی نێودەوڵەتی کە کاریان بازرگانیکردن بووە بە ماددە هۆشبەرکان، هەڵدەوەشێنێتەوە.

 

وێنە گەورەکە: عێراق بووەتە گۆڕەپانی بازرگانانی ماددەی هۆشبەر و کارتێکەرە دەروونییەکان، چەندین تۆڕی ناوخۆیی و نێودەوڵەتی کاری کڕین و فرۆشتن بەو ماددانە دەکەن.

 

چیرۆکی سەرەکی: لە چوارچێوەی هەڵمەتی باڵای ئەمنیی بۆ بەرەنگاربوونەوەی ماددە هۆشبەرەکان کە لەلایەن سەرۆکوەزیرانەوە پەسەندکراوە و بەگوێرەی ستراتیژی نیشتمانیی وەزارەتی ناوخۆ بۆ ساڵانی 2023 تاوەکو 2025، هێزەکانی سەر بە بەڕێوەبەرایەتی گشتیی کاروباری ماددە هۆشبەرەکان هەڵمەتێکی 24 کاتژمێریان ئەنجامدا.

 

ڕاگەیێنراوی فەرمی: بەشی پەیوەندی و ڕاگەیاندن لە بەڕێوەبەرایەتی گشتیی کاروباری ماددە هۆشبەرەکان ڕایگەیاند: هێزەکانمان سەرکەوتوو بوون لە گەیشتن بە 60 تۆڕی نێودەوڵەتی ماددە هۆشبەرەکان، ئاشکراکردنی شێوازی بردن و بە قاچاخبردن و شاردنەوەی ماددە هۆشبەرەکان".

 

ئەوەی پێویستە بیزانیت: بەگوێرەی ئامارەکانی وەزارەتی ناوخۆی عێراق لە هەشت مانگی یەکەمی ئەمساڵدا زیاتر لە 300 بازرگانی ناوخۆیی و نێودەوڵەتیی دەستگیرکراون.