گۆڕان: دە ساڵە چاوەڕێی وەرگرتنی دوو پۆستین لە گەرمیان

ئاڤا نیوز

 

دوای دە ساڵ لە ڕێککەوتنی نێوان یەکێتی و گۆڕان بۆ دابەشکردنی پۆستەکانی سنووری پارێزگاکانی سلێمانی و هەڵەبجە، تاوەکو ئێستا دوو پۆستی ئیدارەی لە گەرمیان بە گۆڕان نەدراوە و بزووتنەوەکەش نیگەرانە. 

 

چیرۆکی سەرەکی: دوای هەڵبژاردنی ئەنجوومەنی پارێزگاکانی کوردستان لە ساڵی 2014 بزووتنەوەی گۆڕان و یەکێتی ڕێککەوتنێکیان لەسەر دابەشکردنی پۆستە ئیدارەییەکانی سنووری سلێمانی واژۆکرد.

 

لێدوانی فەرمی: ساڵح میروەیس، بەرپرسی ڕاگەیاندنی بزووتنەوەی گۆڕان لە کەلار، بە ئاڤا نیوزی گوت: "تاوەکو ئێستا لە گەرمیان پۆستی بەڕێوەبەری پەروەردەی گشتی و بەڕێوەبەری بەڕێوەبەرایەتیی پۆلیسمان پێنەدراوە، کەچی دەبوو ساڵی 2014 ئەو پۆستانە لای گۆڕان بێت".

 

زانیاریی زیاتر: ڕۆژی 11ـی شوباتی ئەمساڵ، یەکێتیی نیشتمانیی کوردستان و بزووتنەوەی گۆڕان لە سلێمانی کۆبوونەوە، جگە لە پرسی مووچە و هەڵبژاردن، یەکێک لە پرسەکانیش ئاڵوگۆڕکردنی پۆستەکانی پارێزگای سلێمانی و هەڵەبجە بوو.