قاسم ئەعرەجی: بۆچوونی حەلبووسی لەبارەی پێشمەرگە سیاسییە

ئاڤا نیوز

ڕاوێژکاری ئاسایشی نەتەوەیی عێراق پێیوایە هیچ کێشەیەک لە پڕچەککردنی پێشمەرگەدا نییە، وەک چۆن هیچ کێشەیەک لە پڕچەککردنی حەشدی شەعبیدا نییە، ئەوان بەشێکن لە دامەزراوە ئەمنییەکان و بۆچوونی حەلبووسیش لەوبارەیەوە "سیاسییە".

لێدوانی فەرمی: قاسم ئەعرەجی، ڕاوێژکاری ئاسایشی نەتەوەیی عێراق لە دیمانەیەکی تەلەڤزیۆنیدا لەبارەی پرسی پڕچەککردنی پێشمەرگە بە چەکی تۆپهاوێژ ڕایگەیاند: "پێشمەرگە بەشێکە لە دامەزراوە ئەمنییەکانی عێراق، وەزارەتی بەرگری لەسەر ئەو بابەتە ڕوونکردنەوەی داوە، وابزانم پێویستی بەوە نەدەکرد بابەتەکە ئەوەندە گەورە بکرێت".

ئەوەی لەوبارەیەوە دەگوترێت: سەبارەت بەو ترسەی کە محەممەد حەلبووسی، سەرۆکی پێشووی پەرلەمانی عێراق ئاماژەی بۆ دەکات لە پڕچەککردنی پێشمەرگە، ئەعرەجی پێیوابوو بۆچوونەکەی لەسەر ئەو بابەتە "سیاسییە".

بابەتی ستراتیژی: ئەعرەجی ئاماژە بۆ ئەوە دەکات کە  "هیچ کێشەیەک لە پڕچەککردنی پێشمەرگەدا نییە وەک چۆن لە پڕچەککردنی حەشدی شەعبی، دژەتیرۆر و هێزی تایبەتدا نییە، هەموویان هێزی پاڵپشتی و پشتیوانین، هیچ لایەک لە دژی لایەکەی دیکە چەک ئاراستەی یەکتر ناکەن.

کاریگەری و لێکەوتەکان: ڕاوێژکاری ئاسایشی نەتەوەیی عێراق دڵنیایی دەدات لەوەی  پێویست بە هیچ نیگەرانییەک ناکات و دەڵێ: "دڵنیام پێشمەرگە چەک دژی هیچ لایەنێک بەکارناهێنێت، چونکە لە کوردستان پیاوی دەوڵەتمەدار و عاقڵ هەن و کار بۆ یەکڕیزی وڵات دەکەن".