ڕووداوەکانی لوبنان کاریگەری لەسەر هەڵبژاردنی پەرلەمانی کوردستان دەبێت؟

ئاڤا نیوز

 

تاوەکو دێت گرژییەکانی نێوان حیزبوڵڵا و ئیسرائیل زیاتر دەبن، لە ئەگەری پەڕینەوەی ئەو شەڕەش بۆ عێراق، کاریگەریی ڕاستەخۆی لەسەر پرۆسەی سیاسیی ناوچەکە، عێراق و هەرێمی کوردستان دروست دەکات.

 

وێنە گەورەکە: لە کاتێکدا 20ـی ئەم مانگە لە هەرێمی کوردستان هەڵبژاردنی پەرلەمانی کوردستان دەکرێت، گرژییەکانی نێوان حیزبوڵڵای لوبنان و ئیسرائیل پەرەدەسێنن و سوپای ئیسرائیل هێرشەکانی لە لوبنان چڕتر کردووەتەوە، هاوکات شەڕی نێوان حەماس و ئیسرائیل بەردەوامە.

 

لێدوانی فەرمی: کارۆخ خۆشناو، سەرۆکی ئینستیتیوتی توێژینەوەی ئەمریکی-کوردی بە ئاڤا نیوزی ڕاگەیاند: بەگشتی ناوچەکە ناسەقامگیرە و ڕووداوەکانی لوبنان کاریگەری و ڕەنگدانەوەی لەسەر عێراق و هەرێمی کوردستان دەبێت، بەڵام هەرێمی کوردستان سیاسەتی ڕاگرتنی باڵانس پەیڕەو دەکات، هەمووکات بێلایەن بووە و لەگەڵ یەکلاکردنەوەی کێشەکان لە ڕێگەی شەڕەوە نەبووە.

 

 سەرۆکی ئینستیتیوتی توێژینەوەی ئەمریکی-کوردی ئاماژەی بەوەش کرد: ئەگەر ڕووبەڕووبوونەوە و گورزە سەربازییەکانی ئیسرائیل بۆ سەر بەرەی مقاومە لە ڕۆژهەڵاتی ناوەڕاست و  عێراق چوارچێوەیەکی دیاریکراوی هەبێت، واتە ئیسرائیل تەنیا لە ڕێگەی هێرشی ئاسمانییەوە بنکە و بارەگاکان بکاتە ئامانج، کاریگەری لەسەر پرۆسەی هەڵبژاردنی پەرلەمانی کوردستان دروست ناکات، بەڵام ئەگەر ئەم پێشهاتانە ببێتە شەڕێکی ناوچەیی و زەمینی و بپەڕێتەوە بۆ عێراق، کاریگەری لەسەر تەواوی ناوچەکە و کۆی پرۆسەی سیاسیی لە عێراق و هەرێمی کوردستان دروست دەکات.