شاندێکی کۆمسیۆنی عێراق لەبارەی هەڵبژاردنی کوردستان سەردانی هەولێر دەکات

ئاڤا نیوز

بڕیارە ڕۆژی سێشەممە شاندێکی کۆمیسیۆنی باڵای سەربەخۆی هەڵبژاردنەکانی عێراق سەردانی هەولێر بکات و لەبارەی هەڵبژاردنی پەرلەمانی کوردستان لەگەڵ سەرۆکایەتیی هەرێم کۆببێتەوە.

وێنە گەورەکە: زیاتر لە ساڵێکە پەرلەمانی کوردستان پەکخراوە و بەهۆی نەگەیشتنی لایەنە سیاسییەکان و تۆمارکردنی سکاڵایەک لەلایەن یەکێتی لە دادگای فیدراڵی، تاوەکو ئێستا نەتوانراوە هەڵبژاردن بکرێت کە سێ جار وادەکەی دواخراوە.

لێدوانی فەرمی: جومانە غەلای، گوتەبێژی کۆمیسیۆنی باڵای سەربەخۆی هەڵبژاردنەکانی عێراق بە ئاڤا نیوزی گوت: "بەمەبەسەتی دیاریکردنی وادەیەکی سەرەتایی بۆ هەڵبژاردنی خولی شەشەمی پەرلەمانی کوردستان، شاندی کۆمیسیۆن دێتە هەولێر و لەگەڵ سەرۆکایەتیی هەرێم کۆدەبێتەوە". 

زانیاری زیاتر: کۆبوونەوەکە بە بەشداری شاندی نەتەوەیەکگرتووەکان دەبێت. لە ناوەڕاستی مانگی ڕابردووش ئەوە دووەمجارە  شاندی کۆمسیۆنی عێراق سەردانی هەولێر دەکات.

بۆچی گرنگە: کۆبوونەوەکە ڕۆژێک پێش کۆبوونەوەی دادگەی فیدراڵی عێراقە کە بڕیارە دوای 11 جار دواخستن، ڕۆژی چوارشەممە کۆتایی بە دادبینی لەبارەی یاسای هەڵبژاردنی پەرلەمانی کوردستان بهێنێت و ئەم پرسە یەکلایی بکاتەوە، کە بەپێی زانیارییەکانی ئاڤا نیوز چەند گۆڕانکارییەکی گەورە لەخۆدەگرێت.