مەسرور بارزانی چارەسەری پێنج کێشەی گەورەی کوردستان دەخاتەڕوو

ئاڤا نیوز

مەسرور بارزانی لەبەردەم هەزار لایەنگری پارتی لە سۆران گوتارێکی پێشکەش کرد، ئاماژەی بە پێنج کێشەی گەورەی هەرێمی کوردستان کرد و چارەسەری هەر پێنج کێشەکەشی خستەڕوو.

چیرۆکی سەرەکی: ئەمڕۆ چوارشەممە دووەم کەرنەڤاڵی لیستی 190ی پارتی دیموکراتی کوردستان بە بەشداریی هەزاران کەس و ئامادەبوونی مەسرور بارزانی لە شاری سۆران بەڕێوەچوو. جێگری سەرۆکی پارتی لە گوتارێکدا چەند پەیامێکی ئاراستەی لایەنە سیاسییەکان و خەڵکی کوردستان کرد.

 

لێدوانی فەرمی: مەسرور بارزانی بە ئاماژەکردن بەو لایەنەی دروشمی تێکدان و ڕووخانی هەڵگرتووە، ڕایگەیاند: "بۆ ئەوەی دەسەڵاتی خۆسەپێن نەمێنێت، دەبێت ئەو دەسەڵاتەی کە بە کودەتا هاتووەتە سەر حکوم و خۆی بەسەر جوومگەکانی حکومڕانی سەپاندووە لە کوردستان، دەبێت کۆتایی بەو دەسەڵاتە خۆسەپێنە بێت". 

زانیاریی زیاتر: مەسرور بارزانی ئاماژەی بە چوار کێشەی دیکەی هەرێمی کوردستان کرد و چارەسەریشی خستەڕوو:

- بۆ ئەوەی کێشەی ماددەی هۆشبەر چارەسەر بکرێت، دەبێت ئەو کارگانەی کە بۆ ماددەی هۆشبەر دروستکراون تێکبدرێن.

- بۆ ئەوەی گەندەڵی نەمێنێت، ئەوانەی پارە سپی دەکەنەوە بە فڕۆکەی تایبەت پارە لە وڵات دەبەنە دەرەوە، دەبێت ئەوانە نەمێنن.

- بۆ ئەوەی خەڵکی کوردستان ئاسوودە بێت، دەبێت چاوسوورکردنەوە و سەرانە سەندن نەمێنێت، دەبێت ترس و تۆقاندن نەمێنێت.

- بۆ ئەوەی تیرۆر نەمێنێت، دەبێت ئەو تیرۆریستانەی کە خەریکی تیرۆرکردنی هاووڵاتی کوردستانن ڕادەستی یاسا بکرێن.