40 پۆندی دیكە لە هەرێمی كوردستان دروست دەكرێن

ئاڤا نیوز

 

لەچوارچێوەی گرنگیدانی كابینەی نۆیەمی حكومەتی هەرێمی كورستان بە ئاسایشی ئاو، 40 پۆندی دیكە لە هەرێمی كوردستان جێبەجێ دەكرێن.

 

زانیاریی بەدەستهاتوو: تاوەكو چەند ساڵێكیش پێش ئێستا لە هەرێمی كوردستان تەنیا 116 پۆند هەبوون، بەڵام لە سەردەمی كابینەی نۆیەمی حكومەتی هەرێمی كوردستان بڕیار لە دروستكردنی زیاتر لە 50 پۆند دراوە.

 

لێدوانی فەرمی: كاروان سەباح هەورامی، بەڕێوەبەری گشتی سەرچاوەکانی ئاوی هەرێمی کوردستان بە ئاڤا نیوزی ڕاگەیاند: تەنیا لە دوو ساڵی ڕابردوو 10 پۆند لە ناوچە جیاجیاكانی هەرێمی كوردستان دروستكراون و ئێستا زیاتر لە 40 پۆندی دیكە لەژێر جێبەجێكردندان، پۆندەكان، بە ستانداردی ئەندازیاری و ژینگەیی و جیۆلۆجی دروستكراون و هیچ مەترسییەكیان لەسەر نییە.

 

زانياريي زياتر: پۆندەكان ساڵانە پاككردنەوەیان لە قوڕ و لیتە پێویستە، بۆ ئەو مەبەستە ئێستا وەزارەتی كشتوكاڵ سەرقاڵی كڕینی ئامێری تایبەتە.

 

ئەوەش بزانە: پۆند بەراورد بە بەنداو تێچووی زۆر كەمترە و لەڕێگەی كەرەستەی سرووشتییەوە دروست دەكرێ و باراناو گلدەدرێتەوە یاخود سوود لە ڕێڕەوێكی ئاو وەردەگیرێت، بەشێوەیەك ئەگەر بەنداوێك سوودی تەنیا بۆ ناوچەیەك هەبێت، بە تێچووی بەنداوەكەوە دەتوانرێت 20 پۆند بۆ 20 ناوچە دروست بكرێ و سوودی بۆ هەزاران كەس دەبێت.

 

ئەوەی پێویستە بیزانیت: ئێستا لە هەرێمی كوردستان لەڕێگەی پۆندەكانەوە دەیان ملیۆن مەتر سێجا ئاو گلدەدرێتەوە، ئەمە بۆ دانیشتووانی گوندەكان سوودی ڕاستەوخۆی هەیە بۆ كشتوكاڵ و ئاژەڵداری بەكاری دەهێنن، هاوكات لەو ڕێگەیەوە بڕێكی زۆر ئاو دەچێتەوە ژێرزەویی ناوچەكە لەڕووی سامانی ئاوەوە هێندەی دیكە دەوڵەمەند دەكات.