وەزارەتی دارایی کاتی بڵاوکردنەوەی خشتەی مووچەی مانگی نۆ ڕادەگەیێنرێت

ئاڤا نیوز

 

وەزارەتی دارایی حكومەتی هەرێمی كوردستان ئاشكرای دەكات،  ڕۆژی پێنجشەممە خشتەی مووچەی مانگی نۆی فەرمانبەرانی هەرێمی كوردستان بڵاودەکرێتەوە.

 

ڕاگەیێنراوی فەرمی: وەزارەتی دارایی و ئابووری هەرێمی کوردستان ڕایگەیاند: "سبەی پێنجشەممە 17-10-2024، خشتەی مووچەی مانگی نۆ ڕادەگەیێندرێت و شاندی تەکنیکی وەزارەتی دارایی هەرێمی کوردستان لە بەغدا لەگەڵ وەزارەتی دارایی حکومەتی فیدراڵ لە هەماهەنگیدا دەبن بۆ چارەسەری تەواوی ئەو شایستە ڕاگیراوانەی چەند مانگی ڕابردوو."

 

لەلایەکی دیکەوە: لە ڕاگەیێندراوەکەی وەزارەتی داراییدا هاتووە: "سێ هەفتەیە شاندی تەکنیکی وەزارەتی دارایی بە مەبەستی چارەسەرکردنی گرفتەکانی بەردەم لیستی مووچە و خەرجکردنی ئەو لێبڕینانەی لە مانگەکانی ڕابردوو ڕاگیرابوون لە شاری بەغدان و چەندین کۆبوونەوەیان لەگەڵ فەرمانگەکانی بودجە و ژمێریاریی وەزارەتی دارایی حکومەتی فیدراڵ ئەنجامداوە، هاوکات بەشی زۆری کێشەکانی لیستی مووچەیان چارەسەر کردووە."

 

زانیاریی زیاتر: ئەو بابەتانەی كە لەو ماوەیەدا شاندی دارایی هەولێر و بەغدا گفتوگۆیان لەبارەیەوە كردووە بریتین لە: نەبوونی بایۆمەتریی بەشێك لە فەرمانبەران، ناوی هاوشێوە، مووچەی فەرمانبەرانی وەزارەتی کارەبا و پەرلەمانی کوردستان، کێشەی فەرمانبەرانی میلاکی حکومەتی هەرێمی كوردستان لە کەرکووک و ناوچە دابڕاوەکان.

 

ئەوەش بزانە: بەپێی ڕاگەیێنراوەكەی وەزارەتی دارایی بڕی ئەو پارەیەی ئێستا لە بەردەستی وەزارەتی داراییدایە بۆ مووچەی مانگی ئەیلوول نزیکەی 800 ملیار دینارە و بڕی پارەی پێویست بۆ مووچەی مانگی ئەیلوول نزیکەی 997 ملیار دینارە.