لە بەغدا دەست بە ڕێکارەکانی ناردنی مووچەی مانگی نۆ دەکرێت

ئاڤا نیوز

لە بەغدا دەست بە ڕێکارەکانی ناردنی مووچەی مانگی نۆ دەکرێت، هەفتەی داهاتوو پارە دەگات و دەست بە دابەشکردنی دەکرێت.

چیرۆکی سەرەکی: حکومەتی کوردستان ئەرکەکانی خۆی تەواو کرد، لە بەغدا دەست بە ڕێکارەکانی ناردنی پارە دەکرێت، چونکە دوو ڕۆژە بڕیاری ناردنی پارە لەلایەن محەممەد شیاع سوودانی، سەرۆکوەزیرانی عێراق دراوە.

ئەمڕۆ وەزارەتی دارایی و ئابووریی کوردستان 120 ملیار دینار داهاتی ناوخۆی بۆ بەغدا نارد، پارەکە بە کاش بە لقی هەولێری بانکی ناوەندی درا.

لێدوانی فەرمی: بەرپرسێکی باڵای حکومەتی عێراق بە ئاڤای ڕاگەیاند، سبەی پێنجشەممە ئەنجوومەنی وەزیرانی عێراق یەکەم هەنگاو دەنێت و نووسراوی خەرجکردنی پارە بۆ وەزارەتی دارایی دەنێرێت، لەوێش ڕێکارەکانی ناردنی پارە تەواو دەکرێن.

زانیاریی زیاتر: بەرپرسەکەی حکومەتی عێراق پێشبینی کرد ڕۆژانی دووشەممە و سێشەممەی هەفتەی داهاتوو، 24 و 25ـی مانگ یان زووتریش پارە بنێردرێت.

بە هەموو پێوەرێک لە ناوەڕاستی هەفتەی داهاتووەوە دەست بە دابەشکردنی مووچەی مانگی نۆ دەکرێت.