ئارام قادر: دەستبەرداری پۆستەکەم بووم نەک حزبەکە

ئاڤا نیوز

 

بەهۆی بەدەستنەهێنانی هیچ کورسییەک لە هەڵبژاردنی پەرلەمان، ئەمڕۆ سەرۆکی هاوپەیمانی نیشتمانی وازهێنانی خۆی لە پۆستەکەی ڕاگەیاند.

 

وێنە گەورەکە: دوێنێ 21-10-2024، کۆمیسیۆنی سەربەخۆی هەڵبژاردنەکانی عێراق، ئەنجامی هەڵبژاردنی بڵاوکردەوە کە لە ڕۆژانی 18 و 20ی ئەم مانگە بەڕێوەچوو بۆ خولی شەشەمی پەرلەمانی کوردستان، هاوپەیمانی نیشتمانی نەیتوانی هیچ کورسیەک بەدەستبهێنێت. 

 

لێدوانی فەرمی: ئارام قادر، سەرۆکی پێشووی هاوپەیمانی نیشتمانی، بە ئاڤا نیوزی گوت: وەک نەریتێکی ڕۆژئاوای کە لە هەڵبژاردن ئەنجامی باش بەدەستناهێنن، سەرۆکی پارتەکە دەستلەکار دەکێشێتەوە و سەرۆکێکی نوێ هەڵدەبژێرن، منیش وامکرد، سەرەڕای ئەوەش ئەمە نەریت و ئەرکێکی ئیسلامیشە، با من لە کوردستان دەستپێشخەربم.

ئارام قادر بۆ ئاڤا نیوز گوتیشی: وازم لە پۆستەکەم هێناوە نەک پارتەکەم، بۆیە وەک هاودید و ئەندامێک دەمێنمەوە، بەڵام هیچ پۆستێکم نابێت، بۆ ئەوەی خەڵک بزانێت پۆستەکە لەسەر ئێمە تا مردن تاپۆ نییە، با خەڵکی نوێ بێتە پێش و حزبەکە پێشبخات.

 

زانیاری زیاتر: ئارام قادر لە ساڵی 2018 بە سەرۆکی هاوپەیمانی بۆ دیموکراسی و دادپەروەری هەڵبژێردرا دواتر ناوی حزبەکەیان گۆڕێ بۆ هاوپەیمانی نیشتمانی، لە ساڵی 2024 وازهێنانی خۆی لەو پۆستە ڕاگەیاند.

 

باکگراوند: هاوپەیمانی بۆ دیموکراسی و دادپەروەری کە ئێستا (هاوپەیمانی نیشتمانی)ە لە 2-10-2017، دامەزرا و بەرهەم ساڵح وەک سەرۆکی هاوپەیمانێتییەکە هەڵبژێردرا.