سوودانی و محەممەد بن سەلمان: دەبێت گرژییەکان ڕابگیرێن

ئاڤا نیوز

 

سەرۆکوەزیرانی عێراق و شازادەی جێنشینی سعودیە چڕکردنەوەی هەوڵەکان بۆ کۆتاییهێنان بەشەڕی غەززە و لوبنان تاوتوێ دەکەن، داواش دەکەن شەڕ کۆتایی پێبهێنرێت و ناوچەکە لە گرژیی زیاتر دووربخرێتەوە.

 

بۆچی گرنگە: عێراق و سعودیە لە چوارچێوەی هەوڵە نێودەوڵەتییەکاندا بەردەوام پشتیووانی دۆزی فەڵەستینن و هەردوولاش داوا دەکەن سەرجەم وڵاتانی ئیسلامی پێکەوە کاربکەن تا ئاشتی لە ناوچەکەدا بەرقەرار ببێت.

 

ڕاگەیێنراوی فەرمی: نوسینگەی ڕاگەیاندنی سەرۆکوەزیرانی عێراق بڵاویکردەوە، محەممەد شیاع سوودانی سەرۆکوەزیران پەیوەندییەکی تەلەفۆنی لەگەڵ محەممەد بن سەلمان بن عەبدولعەزیز، شازادەی جێنشینی سعودیە ئەنجامدا و هەردوولا باسیان لە پەیوەندییە دووقۆڵییەکان و چۆنیەتی پتەوکردن و پەرەپێدانیان لە بوارە جیاجیاکاندا کرد، جەختیشیانکردەوە لە کارکردن بۆ پەرەپێدانی هاوبەشی دووقۆڵیی و هەماهەنگی هەماهەنگی هەڵوێستەکان، بۆ ڕووبەڕووبوونەوەی ئاستەنگییەکان بەمەبەستی خزمەتکردن بە بەرژەوەندییەکانی هەردوو وڵات.

 

زانیاریی زیاتر: شەڕی غەززە و لوبنان بەشێکی دیکەی پەیوەندییە تەلەفۆنییەکە بووە وەک لە ڕاگەیێنراوەکەدا هاتووە "باس لە پێشهاتەکانی دۆخی ناوچەکەش کراوە، لە چوارچێوەی ئەو پەرەسەندنە بەردەوامەی کە ڕوودەدات، جەخت کرایەوە لە هەوڵدان بۆ کۆتاییهێنان بەو شەڕەی کە زیاتر لە ساڵێکە لە غەززە و ماوەی سێ هەفتەیە  لوبنان بەردەوامە، هەروەها گفتوگۆکرا لەسەر ئامادەکارییەکان بۆ ئەنجامدانی لووتکەی ئیسلامی سەبارەت بەو ڕووداوانە و کاردانەوەکانی کە هەڕەشەن لەسەر ئاسایش و سەقامگیری ناوچەکە".