بەشێکی لایەنەکان قسەی پێش هەڵبژاردن و دوای هەڵبژاردنیان جیاوازە

ئاڤا نیوز

لە بانگەشەدا بەشێک لە لایەنە بەشداربووەکان دەیانگوت هەڵبژاردنی ئەمجارە نموونەیی و بێ ساختەکاری دەبێت، بەوپێیەی لەلایەن کۆمسیۆنی باڵای سەربەخۆی هەڵبژاردنەکانی عێراقەوە سەرپەرشتی دەکرێت، بۆیە داوایان لە خەڵک دەکرد بەچڕی بەشداری بکەن، بەڵام دوای ڕاگەیاندنی ئەنجامە بەراییەکان قسەیەکی دیکە دەکەن.

وێنە گەورەکە: لایەنە ناڕازییەکان زیاتر نیگەرانن لە زۆری پێشلکارییەکان لە بازنەی سلێمانی و هەڵەبجە، چونکە لەکۆی  189 سکاڵای تۆمارکراو 86 سکاڵا لە بازنەی سلێمانی و 25 سکاڵاش لە بازنەی هەڵەبجە تۆمارکراون،  هەر ئەمەش وای کردووە چەند لایەنێک ئەنجامەکانی هەڵبژاردن لە بازنەی هەڵەبجە ڕەت بکەنەوە.

گۆشەیەکی دیکە: جیاواز لە هەڵبژاردنەکانی ڕابردوو زۆرترین کاندیدی سەربەخۆ بۆ ئەم هەڵبژاردنە بەشدار بوون، 119 کاندید لە هەرچوار بازنەی هەڵبژاردن ئەسپی خۆیان تاودا، بەڵام هیچیان نەیانتوانی دەنگی پێویست بەدەستبهێنن و بچنە پەرلەمانەوە، ئەوانیش ناڕزاین.

لەلایەکی دیکەوە: ناڕەزایەتی ئەم لایەنانە لەکاتێدایە کۆمیسیۆنی باڵای سەربەخۆی هەڵبژاردنەکانی عێراق پڕۆسەکەی بەسەرکەوتوو دانا، بەشێک لە شارەزایانی هەڵبژاردنیش  دەڵێن لە پڕۆسەی هەڵبژاردن  ئەو لایەنانەی دەنگی کەم بەدەست دەهێنن هەمیشە ناڕازین.

 

خاڵی ئەرێنی: کۆمیسیۆن  سێ لیژنەی پێکهێناوە بۆ یەکلاکردنەوەی ئەو سکاڵایانەی لەلایەن قەوارە سیاسییەکانی هەرێمی کوردستانەوە پێشکەش کراون،  بەوردی کاریان لەسەر دەکات و دواتر ئەنجامەکانیان ڕادەگەیێنێت.